Frantsııa koronavırýsqa qarsy vaktsınalaý strategııasyn ózgertti
BRıÝSSELЬ. QazAqparat – Búgin Frantsııanyń Densaýlyq saqtaý mınıstri Olıve Veran ulttyq vaktsınalaý strategııasyna engizilgen ózgerister týraly aıtty, dep habarlaıdy QazAqparat.
Frantsııa úkimetin sońǵy kezderi halyqty vaktsınalaý úderisiniń sylbyrlyǵy úshin jergilikti qoǵamdastyq qatty synap júr. Qarttar úıindegi azamattardy vaktsınalaýdy qarastyratyn birinshi fazany densaýlyq saqtaý mınıstrligi tym baıaýlatyp jiberdi.
Vedomstvo ókilderi vaktsına dozasyn jibermeı turyp, mekemelerden ekpe alǵysy keletin azamattardyń tizimin jiberýdi suraǵan. Qarttar úıi turǵyndarynyń kelisimin alýmen baılanysty jaǵdaıdyń kúrdelenip ketýi, vaktsına aldyndaǵy medıtsınalyq tekserýler de bul úderisti tejeı tústi.
«Kóp adamdardyń vaktsına alýǵa degen quqyǵy keńeıedi, tirkeý protsedýralary da jeńildeıdi»,-dedi Frantsııa televızııasynyń efırinde Densaýlyq saqtaý mınıstri.
Endi Frantsııada preparatty úıden qyzmet kórsetetin medıtsına mamandary men 50-den asqan órt sóndirýshiler de ala alady. Buǵan deıin osy kategorııadaǵy azamattar Frantsııadaǵy besdeńgeıli vaktsınalaý josparynyń ekinshi bóligine kirgen.
«Vaktsına alǵan azamattar sany aldaǵy birneshe kúnde bizdiń kórshilerimizdi basyp ozady»,-dedi O.Veran.
Onyń sózinshe, aptanyń ortasyna taman taǵy 100 aýrýhana vaktsınalaýǵa daıyn bolady, sondaı-aq 100 vaktsınalaý ortalyǵy bıylǵy jyldyń qańtarynda ashylady.
Arnur Rahymbekov
