Frantsııa Qazaqstanmen shyǵarmashylyq jobalarǵa qyzyǵýshylyq tanytýda - elshi Fılıpp Martıne
ASTANA. QazAqparat - Almatydaǵy 2018 jylǵy halyqaralyq djaz festıvaliniń sońǵy kúninde Germanııa men Frantsııa mýzykanttaryóner kórsetti. Bul memleketterdiń ónerpazdary osy festıfal bastalǵaly 17 jyl boıy sharaǵa úzdiksiz qatysyp kele jatyr, dep habarlaıdy «QazAqparat» HAA tilshisi.
Favo nemis trıosy Almatydaǵy djaz festıvalinde ózderiniń Ortalyq Azııa elderine gastroldik saparyn bastady. Olar Qazaqstanda Qaraǵandy qalasynda jáne Almaty oblysyndaǵy áıelder kolonııasynda óner kórsetip, keıin Bishkek, Dýshanbe jáne Ashhabad qalalaryna barady.
Frantsııalyq Swing de Paris kvınteti óz ónerlerin Django Reınhardt pen Stefan Grappellıge, sondaı-aq Almatydaǵy byltyrǵy djaz festıvaliniń qatysýshysy, birneshe apta buryn qaıtys bolǵan skrıpkashy Dıde Lokvýdqa arnady.
Bıyl Almatydaǵy halyqaralyq djaz festıvali «Jahandyq álemdegi zamanaýı Qazaqstan mádenıeti» arnaıy jobasy, Memleket basshysynyń «Rýhanı janǵyrý» baǵdarlamasy aıasynda ótti. Qazaqstandaǵy Frantsııa elshisi Fılıpp Martıne mádenıettiń árdaıym kez kelgen eldiń ómirindegi mańyzdy sala bolyp qala beretinin tilge tıek etti. Sondyqtan, Frantsııa djaz festıvalin qoldap, barlyq eldermen, sonyń ishinde Qazaqstanmen mádenıet salasynda yntymaqtastyqqa aıryqsha kóńil bólip kele jatqanyn jáne birlesken shyǵarmashylyq jobalarǵa basa nazar aýdaryp otyrǵanyn aıtty.
«Bul festıval Almatynyń vızıttik kartochkasy ispettes, mundaı sharalar Qazaqstandy jaqynnan tanyp, Almatyny Ortalyq Azııanyń mádenı qalasy retinde tanystyrýǵa múmkindik beredi. Frantsııada mýzykany damytý saıasaty tek mádenıetke ǵana emes, ekonomıkalyq salaǵa da áser etedi. Festıval aıasynda osynda, sondaı-aq 21 maýsym kúni Búkilálemdik mýzyka kúninde Qazaqstan men Frantsııa ókilderiniń birlesken shyǵarmashylyǵyna arnalǵan platforma quryp, mýzyka men ónerdiń sandyq túrinde yntymaqtastyqty nyǵaıtamyz dep úmittenemin», - dedi Fılıpp Martıne.
