Frantsııa Qazaqstanǵa 13,6 mlrd dollardan astam ınvestıtsııa quıdy
ASTANA. QazAqparat - 2017 jyldyń alǵashqy jartyjyldyǵynda Qazaqstan men Frantsııa arasyndaǵy syrtqy saýda aınalymy 46 paıyzǵa artty, dep habarlaıdy QazAqparat tilshisi.
Bul týraly búgin QR Investıtsııalar jáne damý mınıstri Jeńis Qasymbek Qazaqstan-frantsýz ekonomıkalyq yntymaqtastyq jónindegi úkimetaralyq komıssııanyń HІІІ otyrysynda málim etti.
Óz sózinde mınıstr Frantsııanyń EKSPO-2017 kórmesine qatysýy eki el qarym-qatynasynyń joǵary deńgeıin aıǵaqtaıtynyn atap ótti jáne Frantsııanyń Qazaqstannyń negizgi seriktesteriniń biri ekenin basa aıtty.
«Qýatty ekonomıkalyq áleýeti bar Frantsııa Qazaqstannyń Eýropadaǵy negizgi saýda seriktesteriniń biri. Eki el arasyndaǵy taýar aınalymy qarqyndy túrde ósip keledi. 2017 jyldyń alǵashqy jartyjyldyǵynda Qazaqstan men Frantsııa arasyndaǵy syrtqy saýda aınalym 1,7 mlrd AQSh dollaryn qurady. Bul ótken jyldyń alǵashqy alty aıymen salystyrǵanda, 46 paıyzǵa joǵary», - dedi Jeńis Qasymbek.
Mınıstrdiń aıtýynsha, Frantsııa Qazaqstannyń negizgi saýda seriktesteriniń úzdik bestigine enedi. Bul el Qazaqstanǵa ınvestıtsııa quıý boıynsha da besinshi orynda tur. Sońǵy 12 jylda Frantsııa Qazaqstanǵa 13,6 mlrd AQSh dollaryn ınvestıtsııalaǵan. Qazirgi ýaqytta Qazaqstanda 140-tan astam frantsýz kompanııalary túrli salalarda tabysty eńbek etýde.
Aıta keteıik, búgin Astanada Qazaqstan-frantsýz ekonomıkalyq yntymaqtastyq jónindegi úkimetaralyq komıssııanyń HІІІ otyrysy ótti. Otyrysta saýda men ınvestıtsııa, energetıka, sonyń ishinde jańartylǵan energııa kózderi, ǵaryshtyq qyzmet, qorshaǵan ortany qorǵaý, aýyl sharýashylyǵy, densaýlyq saqtaý jáne taǵy da basqa salalar boıynsha ekijaqty yntymaqtastyq máseleleri talqylandy.
Qos tarap úkimetaralyq komıssııanyń kelesi otyrysyn Frantsııada ótkizýge ýaǵdalasty. Sharanyń ótetin orny men naqty ýaqyty dıplomatııalyq arnalar arqyly qosymsha kelisiledi.
