Frantsııa halal ónimin tutynýda Ulybrıtanııa men Germanııany basyp ozdy
ASTANA. 10 sáýir. QazAqparat - Parıjde «Halal Expo 2013» atalatyn halal ónimderiniń onynshy kórmesi óz jumysyn bastady. Bul sharaǵa halal ónimderin daıyndaıtyn kásiporyndardyń 80-nen asa ókili qatysýda.
Uıymdastyrýshylardyń shamalaýynsha, kórmeni 7 myńnan astam adam tamashalaıdy. Olardyń 15 paıyzyn sheteldik meımandar quraýy múmkin. Bul jaıynda «Ýmma-ınform» aqparat agenttigine silteme jasap muslim.kz saıty habarlady.
Atalmysh kórmede jurtshylyq Eýropa naryǵyndaǵy halal ónimderiniń sony túrlerimen tanysady. Ádettegishe jurt nazaryna usynylatyn ónimderdiń 91 paıyzyn agrarlyq sektordyń ónimderi quraıtyn bolady. Sonymen birge, Eýropa halal naryǵy úshin jańalyq bolyp tabylatyn kosmetıkalyq ónimder de kórmege qoıylady.
Aqparat agenttiginiń habarlaýyna qaraǵanda, búgingi tańda Frantsııada halal ónimderin tutynatyndar qatary 7 mln. adamdy quraıdy. Bul kórsetkish frantsýzdyq organıkalyq taǵam ónimderiniń arasyndaǵy áıgili naryqqa qaraǵanda 4 esege kóp.
«Frantsııadaǵy halal ónimderiniń naryǵy damý qarqyny jaǵynan Ulybrıtanııa men Germanııaǵa qaraǵanda áldeqaıda alda. Kórnekti frantsýz marketologtarynyń aıtýynsha, búgingi tańda Frantsııadaǵy halal ónimderiniń naryǵyndaǵy taýarlar aınalymy 5,5 mln. eýroǵa baǵalanyp otyr. Al 2013 jyly bul kórsetkish 9 paıyzǵa ósti», - delingen «Halal Expo 2013» uıymdastyrýshylarynyń resmı saıtynda.
Onynshy halal ónimderiniń kórmesi Parıjdegi «Porte de Versailles» dep atalatyn áıgili ekspo-ortalyqta eki kúnge sozylady.
