Frantsııa Google jáne Amazon-ǵa 135 mıllıon eýro aıyppul saldy

LION. QazAqparat – Informatıka jáne azamattyq bostandyqtar jónindegi frantsýz komıssııasy Google jáne Amazon amerıkalyq ınternet-kompanııalaryna aıyppul saldy.

Buǵan paıdalanýshylardyń jeke aqparaty bar cookie faıldaryn olardyń kelisiminsiz paıdalanýy sebep boldy, dep habarlaıdy QazAqparat Euronews-ke silteme jasap.

«Gýglǵa» €100 mıllıon, al «Amazonǵa» €35 mıllıon aıyppul salyndy. Frantsýz zańyna sáıkes, ınternet-saıttar paıdalanýshylarǵa saıtta cookie arqyly aqparat jınalatynyn jáne onyń qandaı maqsatta júzege asyrylatynyn habarlaýy tıis. Ádette ınternette jarnama jasaıtyn ınternet-kompanııalar aqparatty osyndaı faıldar arqyly alyp jatady.

Cookie faıldary paıdalanýshynyń qandaı saıttarǵa kiretini týraly aqparatty qamtıdy. Olar paıdalanýshynyń nege qyzyǵatyny nege suranys týdyryp otyrǵanyn anyqtaýǵa múmkindik beredi.