Frantsııa fýtbolshysy Álem chempıonatyndaǵy syıaqysyn qaıyrymdylyqqa berdi
ASTANA. QazAqparat - Fýtboldan 2018 jylǵy Álem chempıonaty jurtty súısindirgen qaıyrymdylyq oqıǵalarymen de este qalyp otyr. Frantsııa quramasynyń oıynshysy Kılıan Mbappe týrnırdegi oıyny úshin ózine tıesili syıaqydan bas tartty. Bul týraly Twitter-degi FourFourTweet akkaýnty L'Equipe basylymyna silteme jasap habarlady.
2018 jylǵy Álem chempıonatynyń úzdik jas fýtbolshysy atanǵan Mbappe ulttyq qurama sapynda mýndıaldaǵy jeńisi úshin beriletin syıaqynyń barlyǵyn qaıyrymdylyqqa baǵyttamaq. Atap ótilgendeı, 550 myń dollar kólemindegi qarajat múgedek balalardyń qajettiligine jumsalatyn boldy.
Eske salaıyq, keshe, 15 shilde kúni Frantsııa quramasy fınaldyq kezdesýde Horvatııadan 4:2 esebimen basym túsip, eki dúrkin álem chempıony atanǵan bolatyn. Tórtinshi goldy Mbappe soqty.
Buǵan deıin habarlaǵanymyzdaı, FIFA Frantsııa Fýtbol federatsııasyna osy týrnırdegi jeńisi úshin 38 mln dollar syıaqy beredi.
Aıta keteıik, buǵan deıin Horvatııa ulttyq quramasynyń múshesi Ante Rebıch te óz aýyldastarynyń nesıelik-qaryzdarynyń barlyǵyn ótep bergen bolatyn.
