Frantsııa elshisi ShQO-nyń kıeli jerlerin aralaıdy
ÓSKEMEN. QazAqparat - Bizdiń zamanymyzǵa deıingi VII ǵasyrda altyn soǵý tehnologııasy túrkilerden basqa álemniń eshbir elinde bolmaǵan. Bul týraly Shyǵys Qazaqstan oblysynyń ákimi Danıal Ahmetov aıtty.
Frantsııanyń Qazaqstandaǵy Tótenshe jáne ókiletti elshisi Fılıpp Martınemen kezdesken oblys basshysy elshige óńirdiń óndiris salasyndaǵy áleýeti jóninde sóz qozǵady.
Danıal Ahmetov Shyǵys Qazaqstannyń tarıhyna da toqtalyp, Elshini Bereldegi Patshalar jazyǵy men Zaısan aýdanyndaǵy Shilikti qorymdary sııaqty kıeli oryndardy aralaýǵa shaqyrdy. Ákim óz sózinde Shyǵys Qazaqstanda b.z.d. VII ǵasyrda túrkilerdiń biregeı metallýrgııalyq tehnologııasy bolǵanyn atap ótti. Sondaı-aq, aldaǵy tańda b.z.d. VII jáne IV ǵasyrlarda bolǵan «zaýyttar» tabylýy yqtımal degen úmit baryn jetkizdi.
«Biz ulttyq mádenıetimizben maqtanamyz. Kópshilik bizdiń halyqtyń kóshpeli turmysy úlken múmkindikterge jol ashpaǵan dep oılaıdy. Alaıda, bizdiń zamanymyzǵa deıingi VII ǵasyrda Shyǵys Qazaqstanda ata-babalarymyz biregeı metallýrgııalyq tehnologııany ıgergeni dáleldenip otyr. Álemniń eshbir elinde ol ýaqytta altyn soǵý tehnologııasy bolǵan emes. Ótken jyldary úlken kólemde artefakt qazyp aldyq. Sol zergerlik buıymdar men qarý-jaraqtar ata-babalarymyzda bolǵan joǵary metallýrgııalyq mádenıetti aıǵaqtaıdy. Sózsiz, bul osy kúnderge deıin bolǵan memlekettiliktiń joǵary deńgeıin kórsetedi, - dep atap ótti ákim.
Elshi arheologııa salasynda seriktestik ornatý, onyń ishinde Patshalar jazyǵy frantsýzdyq sarapshylar úshin óte qyzyqty ekenin atady. Óz kezeginde Fılıpp Martıne aımaq basshysynyń shaqyrýyn qabyl alyp, týrıst retinde keletinin jetkizdi. Kezdesý barysynda sondaı-aq, óńirde frantsýz tilin zamanaýı ádis boıynsha oqytý týraly kelisim jasaldy.
