Frantsııa elshisi qazaqstandyqtarǵa erekshe quttyqtaýyn joldady
ASTANA. QazAqparat - Frantsııanyń Qazaqstandaǵy Tótenshe jáne Ókiletti elshisi Fılıpp Martıne Astananyń aıshyqty jerlerin aralap, qazaqstandyqtarǵa óziniń jańa jyldyq quttyqtaýyn joldady, dep habarlaıdy QazAqparat tilshisi.
F.Martıne aldymen eski temirjol vokzalyna baryp, ótken jyldyń negizgi sharalaryna toqtaldy.
«Sálem, Astana! Mine, taǵy bir jyl artta qaldy. 2018 jyl Frantsııa men Qazaqstan arasyndaǵy strategııalyq áriptestistiktiń 10 jyldyǵy, frantsýz Naýryzy, Tsıfrlyq kúz jáne Astananyń 20 jyldyǵy sııaqty aýqymdy is-sharalarmen este qaldy. Keler 2019 jyldan da kúterimiz kóp», - dedi elshi. Osydan keıin ol Qazaqstandaǵy eń úlken Týdyń janynda turyp, tilek aıtty. «Qurmetti qazaqstandyqtar, Dońyz jylynda aspandaryńyz búgingideı shaıdaı ashyq bolsyn! Kóńilderińiz toq, ýaıym-qaıǵy joq bolsyn! Kók Týlaryńyz árqashan beıbitshiliktiń jarshysy bolyp, jelbireı bersin!», - dep atap kórsetti F.Martıne.
Elshi Astanadaǵy Áziret Sultan meshitine de bardy. Sol jerde basyna taqııa kıip turyp, jyly lebizin jetkizdi.
«Jańa jylda senimderińiz berik, rýhtaryńyz bıik, ımandaryńyz joǵary bolsyn!», - dedi ol.
Budan bólek, F.Martıne balyq aýlap, syrǵanaq tepti. Al eń sońynda úıde otyryp, sháı ishedi. «Osyndaı kyzyqqa toly aıazdy kúnde jyly úıde yp-ystyq shaı ishkenge ne jetsin! Jańa jyl qutty bolsyn!», - deıdi elshi.
