Frantsııa elshiligi Qazaq elin Táýelsizdik kúnimen erekshe quttyqtady
ASTANA. QazAqparat - Qazaqstandaǵy Frantsııa elshiligi qazaqstandyqtardy Táýelsizdik kúnimen quttyqtap, feısbýktegi paraqshasyna vıdeojoldaýdy jarııa etti, dep habarlaıdy QazAqparat tilshisi.
Vıdeoda elshilik qyzmetkerleri qazaqstandyqtardy Táýelsizdik kúnimen biryńǵaı qazaq tilinde quttyqtap jatqanyn kórýge bolady. Quttyqtaý vıdeoda Frantsııanyń Qazaqstandaǵy Tótenshe jəne Ókiletti Elshisi Fılıpp Martıne júrekjardy lebizin bildire kele jaqynda ǵana Nursultan Nazarbaevtyń jarııalanǵan «Uly dalanyń jeti qyry» maqalasy týraly da atap ótedi.
«Jaqynda ǵana Prezıdent Nazarbaevtyń qazaqtyń uly tarıhy jaıly maqalasy jarııalandy. Ol maqalada Prezıdent ulttyq tarıhty jeke emes, birtutas qalpynda ǵylymı turǵyda zerttep-zerdeleý kerek dedi», - deıdi Fılıpp Martıne.
Elshilik qyzmetkerleri bolashaqqa nyq qadam basyp, búgingini barynsha baǵalaý úshin, ótken kúnniń qýanyshty sátteri men qasiretin umytpaý kerektigin aıtady.
«Menińshe, Qazaqstandy biregeı etip turǵan - onyń ártúrliligi. Qazaqstannyń mádenıeti men ádebıeti, óneri, halqy, tipti tabıǵaty da ártúrli. Kópultty Qazaqstandy Eýropaǵa da, Azııaǵa da jatqyzýǵa bolady. Bul Qazaqstannyń óte baı ekeniniń dáleli. Sizder úshin eń mańyzdy kún - Táýelsizdik kúnimen shyn júrekten quttyqtaımyz», - deıdi elshi.
Eske sala ketsek, qazaq tilindegi júrekjardy tilegin aıtyp, memlekettik tilimizge qurmetin Frantsııa elshisi buryn da kórsetken edi. Fılıpp Martıne buǵan deıin Túrkistan qalasynan qazaq tilinde reportaj júrgizgen bolatyn.
