Frantsııa: ekstremızm úshin sottalǵandar azamattyǵynan aıyrylýy múmkin
ASTANA. QazAqparat - Frantsııa parlamentiniń tómengi palatasy - ulttyq jınalys konstıtýtsııaǵa lańkestik áreket jasaǵany úshin sottalǵandardy azamattyqtan aıyrý týraly ózgertý engizýdi maquldady.
Atalǵan zań jobasyn 162 depýtattyń 148-i qoldap daýys bergen. Bul nátıjeni premer-mınıstr Manýel Vals jaqsy baǵalady. Degenmen depýtattar jaqynda qaıtadan daýys bermek. Osydan keıin qujatty parlament kongresi talqylaıdy. Al buǵan deıin senat osynyń aldynda eldegi tótenshe jaǵdaı rejıminiń merzimin 3 aıǵa uzartý týraly sheshimdi resmı bekitken bolatyn.
Esterińizge sala keteıik, Frantsııa ótken jyldyń 13 qarashasynda 130 adamnyń ómirin qıǵan lańkestik áreketterden keıin qaýipsizdikti qamtamasyz etý sharalaryn kúsheıtken edi, dep jazady 24.kz.
