Frantsııa Brazılııamen áýe qatynasyn toqtatty
BRıÝSSELЬ. QazAqparat – Frantsııa Brazılııada anyqtalǵan Covid-19 vırýsynyń jańa mýtatsııasynyń taralýynyń aldyn alý maqsatynda ońtústikamerıkalyq elmen áýe qatynasyn toqtatty, dep habarlaıdy QazAqparat.
Frantsııanyń premer-mınıstri Jan Kasteks bul týraly seısenbi kúni málimdegen. Sarapshylardyń pikirinshe, R1 retinde belgili «brazılııalyq nusqa» óte juqpaly jáne naýryz aıynda bul elde koronavırýstan ólim oqıǵalary sanynyń kúrt ósýine sebep bolǵan.
«Biz jaǵdaıdyń nasharlap bara jatqanyn baıqap, Brazılııa men Frantsııa arasynda barlyq áýe reısterin toqtatý týraly sheshim qabyldadyq», - dep málimdedi J.Kasteks.
Premer-mınıstr Brazılııa saıahatshylarynyń endi Frantsııaǵa ushar aldynda jáne munda jetken soń Covid-19 vırýsyna test tapsyryp, sondaı-aq 10 táýlik karantınde bolýy tıis ekenin atap ótti.
Pandemııa bastalǵaly, Frantsııada koronavırýsqa shaldyǵýdyń 5,1 mln oqıǵasy tirkelgen, bul – Eýropadaǵy eń joǵary kórsetkish. Pandemııa saldarynan elde 99 myńnan astam adam qaıtys boldy.
