Frantsııa bıznesmenderi SQO-ǵa kelip, kásip ashpaq

SQO ákimdiginiń baspasóz qyzmeti habarlaǵandaı, óńir basshysy Qumar Aqsaqalov Frantsııanyń Qazaqstandaǵy tótenshe jáne ókiletti elshisi Fılıpp Martınemen kezdesý ótkizdi. Jıynǵa Frantsııanyń bir top kásipkerleri qatysty.

Frantsııa elshisi Fılıpp Martıne oblys basshylyǵyna qonaqjaılyq tanytqanyna alǵysyn bildirdi. Frantsýz kásipkerleri jıynda ózderiniń jobalaryn usyndy. Kásipker Patrık Hoffman óńirde eýropalyq talaptarǵa saı shoshqa keshenin salýǵa daıyn ekendigin málimdedi. Investıtsııa kólemi 200 mln eýrony quramaq. 1000 adamǵa jumys orny ashylady. Bıznesmen Reseı Federatsııasynyń Lıpetsk qalasynda shoshqa sharýashylyǵyn damytyp jatyr. Etti Qytaıǵa eksporttaıdy. Kompanııanyń jyldyq tabysy 50 mln dollardan asyp jyǵylady.

«Jobany iske asyrý úshin bizdiń keshen 100 myń tonna bıdaı saqtaı alatyn elevatordyń mańynda bolýy tıis. Sondaı-aq, 10 myń ga jer men 10 mVt elektr qýaty qajet. Sizderdiń taraptaryńyzdan ınfraqurylymdy damytýǵa kómek bolsa jobany osy oblysta ashýǵa bolady», - kompanııanyń kommertsııalyq dırektory Antýan Mendelovıchı.

Óńir basshysy atalmysh jobanyń júzege asýyna barynsha qoldaý kórsetiletinin atap ótti.

«Soltústik Qazaqstan oblysy bul jobany júzege asyrýǵa óte qolaıly meken. Biz úlken qyzyǵýshylyq tanytyp otyrmyz. El boıynsha aýyl sharýashylyǵy salasyna eń kóp ınvestıtsııa quıatyn bizdiń óńir. Frantsııalyq kásipkerlerge barynsha kómek kórsetemiz», - dedi Qumar Aqsaqalov.

Oblys ákiminiń aıtýynsha, Qazaqstanǵa ınvestıtsııa quıýdan Frantsııa qazir besinshi orynda tur jáne bul memlekettiń úlesi jyl saıyn artyp keledi.