«Frantsııa ArcelorMittal kompanııasynyń ornyna basqa áriptes izdestirip jatyr» - respýblıkalyq basylymdarǵa sholý
***
«Egemen Qazaqstan» gazeti búgingi sanynda jazýynsha, Astanada ótetin EXPO-2017 halyqaralyq kórmesi taqyrybyndaǵy jel men kún tabıǵı kúshterinen elektr qýatyn alýdyń ádisin «Azat» sharýa qojalyǵynda qoldanysqa engizilip jatyr. «Al osy másele biraz jyldan beri ózin tolǵandyryp júrgen, bir bastaǵan istiń túbine jetpeı tynbaıtyn azamattyń esimin atasaq, onyń kópshilikke tanymaldyǵy anyq jáne syrtqary jerlerge de belgili ekeni málim. El egemendiginiń eleń-alańynda eski sharýashylyq júıesi kúırep, jańa zaman talaby esken kezde Qaraǵandy aımaǵynda alǵashqy jekeshelengen qojalyqty qurǵan jan retinde aıan bolsa, ol-ol ma, sol ýaqytta jurtqa múldem tańsyq saıatshylyqty qyr tósine qaıta oraltýymen sheteldikterdiń de qyzyǵýyn týdyrǵan adam. Minekı, jetpistiń bel ortasynan assa da áli tynymsyz qalpyndaǵy Tilekeń - Tileýqabyl Esenbekuly sońǵy jyldarda osy jaqqa taǵy bir tosyn is - elektr qýatyn Jeldiń kúshi, Kúnniń qyzýy arqyly alyp, kádege asyrýǵa muryndyq bolyp keledi»,-dep jazady basylym. Maqala «Jel men Kún - bolashaqtyń energııasy» atty taqyryppen berilgen.
Osy basylymda «The Financial Times: «Londonnyń Joǵarǵy soty Ábilázovten 2 mlrd. dollar óndirýge qaýly shyǵardy» atty taqyryppen maqala basyldy. Batystyń jetekshi BAQ-tary, onyń ishinde The Financial Times gazeti men VVS telearnasy jaqynda Londonnyń Joǵarǵy soty qylmysker Muhtar Ábilázovten qazaqstandyq BTA Bank paıdasyna 2 mlrd. dollar kóleminde tólem óndirýge qaýly shyǵardy, dep habarlady. Atalǵan basylymda jazylǵandaı, Ábilázovtiń zańsyz ıelengen qarjy kólemi alty mıllıard dollardy qurap otyrǵan kórinedi. Al sarapshylar pikiri boıynsha, banktiń burynǵy dırektorlar keńesiniń jetekshisi Qazaqstannan BTA men offshorlar arqyly 10 mıllıardqa jýyq dollar shyǵarǵan.
2010 jyldyń jeltoqsan aıynda brıtandyq apellıatsııalyq sot londondyq Joǵarǵy sottyń M.Ábilázovtiń jalpy kólemi 5 mlrd.-qa jýyq aktıvterine ishki basqarýdy engizý qajettiligi týraly sheshimin bekitti. Óıtkeni atyshýly qashqyn bankır aktıvterdi toqtatý týraly 2009 jyly berilgen orderdi oryndaǵan joq bolatyn.
***
«Kezinde daryndy rejısser, qazaq kásibı rejıssýrasynyń damýyna ólsheýsiz úles qosqan kórnekti teatr qaıratkeri, KSRO halyq ártisi, QR Memlekettik syılyǵynyń ıegeri, Halyq Qaharmany Ázirbaıjan Mámbetov sahnalaǵan qoıylymdar búginde kelmeske ketti. Ol 30 jyldan artyq ýaqyt qyzmet etken Qazaqtyń M.Áýezov atyndaǵy memlekettik akademııalyq drama teatrynda da Mámbetov týyndylary saqtalmaı otyr. Bul týraly Ázirbaıjan Mádıulyn eske alý keshinde teatr rejısseriniń áıeli, Qazaqstannyń Halyq ártisi, ánshi Qorlan Qalılambekova aıtty»,-dep jazady «Alash aınasy» basylymy. Maqala «Mámbetov spektaklderi qaıda ketti?» degen taqyryppen jarııalanyp otyr.
Osy basylymda «Qubyrdyń ory - kóliktiń sory» atty maqala jaryq kórdi. «Alash aınasynyń» jazýynsha, bıyl qyrkúıek aıynyń basynda Almaty qalasynyń ákimshiliginde ótken qysqa qamdaný sharalaryn pysyqtaýǵa arnalǵan keńeste Almatyda jylý maýsymyna daıyndyq jospar boıynsha júzege asýda, jylý qubyrlaryn jańartý jumystary merziminde aıaqtalady delingen edi. Alaıda qubyrlar úshin qazylǵan orlar áli de ashyq, úńireıip jatqan soń, olarǵa kólikter birinen keıin biri túsip jatyr.
***
«Ekspress K» gazetiniń jazýynsha, Frantsııanyń ónerkásip mınıstri Arno Montebýr úkimet el ishinde álemdegi iri metallýrgııalyq ArcelorMittal kompanııasyn kórgisi kólmeıtinin málimdedi. «Bizge Mittal kerek emes, sebebi ol Frantsııany qurmettemeıdi»,-dedi ol. Montebýrdiń sózine qaraǵanda, atalǵan kompanııa memleket aldynda alǵan mindetterin jıi buzyp kelgen eken. Qazirgi kezde úkimet Frantsııada ArcelorMittal basqarǵan óndiristerdi ózine alatyn áriptesti izdestirip jatqan kórinedi. Bul materıal «Frantsııa reshıla ızgnat ArcelorMittal» degen taqyryppen berildi.
