Frantsııa Almaty oblysymen ekonomıkalyq seriktes bolǵysy keledi
TALDYQORǴAN. QazAqparat - Frantsııanyń Qazaqstandaǵy tótenshe jáne ókiletti elshisi Fılıpp Martıne Almaty oblysyna issaparmen keldi. Taldyqorǵan qalasynda óńir basshysymen kezdesip eki el arasyndaǵy áriptestikti damytý joldaryn qarastyrdy, dep habarlaıdy QazAqparat tilshisi.
Oblys ákimi Amandyq Batalov Jetisý jeriniń áleýmettik-ekonomıkalyq jaǵdaıyn tanystyryp, qaı salada birlese jumys isteýge bolatynyn áńgimilep berdi. Al Frantsııa elshisi Almaty oblysy arqyly Qytaı naryǵyna shyǵyp, Alataý bókterinde taý shańǵysy jáne basqada ekstrımaldy sport túrlerin damytýǵa qyzýǵyshylyq tanytyp otyrǵandaryn jetkizdi.
Budan bólek ol qazaq jastaryn Frantsııada oqytyp, týrızm salasyn túrlendirýge úles qosýǵa daıyn ekendikterin aıtty. Qazir Frantsııa elinde 600-ge jýyq qazaqstandyq stýdent oqyp jatyr. Elshiniń málimdeýinshe bul kórsetkishti myńnan asyrýǵa múmkindik bar. Ol úshin Qazaqstanda frantsýz tili oqytylatyn úıirmeler kóptep ashylatyn bolady. Sondaı-aq elshi Prezıdent Nursultan Nazarbaevtyń «Nurly jol» jáne «Jańa Jibek joly» baǵdarlamalary aıasynda eki elge tıimdi mol múmkindikter bar ekenin tilge tıek etti.
«Álem almanyń otany Almaty oblysy dep biledi. Frantsýzdar aýyl sharýashylyǵy salasynda da utymdy jobalar usynýǵa daıyn», deıdi Fılıpp Martıne.
Frantsııanyń Qazaqstandaǵy tótenshe jáne ókiletti elshisi Fılıpp Martıne Jetisý óńirinde birneshe kún bolyp, Qorǵas shekarasyna deıin baryp, óńirdiń ekonomıkalyq áleýetin óz kózimen kórip qaıtpaq.
