Frantsııa Ábilázovti Ýkraınaǵa ekstradıtsııalaý máselesin qarastyryp jatyr - Bas prokýratýra
Bul týraly búgin Bas prokýratýranyń resmı ókili N.Súıindikov málim etti.
Eske sala keteıik, Frantsııada ustalǵan BTA banktiń burynǵy basşysyna qatysty Qazaqstannan bólek Ýkraına men Reseıdiń quqyq qorǵaý organdary ekstradıtsııalaý týraly ótinish bergen.
«Atalǵan protsester bir-birinen táýelsiz júrýde. Eshkimniń de basqa memlekettiń quzyretti organdarymen aıyptalǵan tulǵalardy izdeý jáne ustap berýge qatysty sheshimderdiń qabyldanýyna aralasýǵa nemese áser etýge quqyǵy joq. Al qylmys jasaǵan kúdikti tulǵalardy ekstradıtsııalaý máseleleri olar jasyrynyp júrgen elderdiń ishki zańnamasymen, sondaı-aq halyqaralyq kelisimdermen retteledi», - dedi N.Súıindikov.
Resmı ókildiń aıtýynsha, Frantsııa, Reseı jáne Ýkraına 1957 jylǵy 13 jeltoqsanda Parıjde jasalǵan Quqyq buzýshylardy ustap berý týraly Eýropalyq konventsııanyń qatysýshylary. Al Qazaqstan bul konventsııanyń qatysýshysy emes.
«Qazirgi tańda Frantsııa bıligi halyqaralyq mindettemelerge sáıkes, Ábilázovti Ýkraınaǵa ekstradıtsııalaý máselesin qarastyrýda. Degenmen, Ábilázovtiń osy konventsııa negizinde Reseı Federatsııasyna da ekstradıtsııalanýynyń zańdy múmkindigi joqqa shyǵarylmaıdy. Al konventsııanyń 17-baby birneshe memleketten ekstradıtsııalaý týraly ótinishter kelip túsken kezde aıyptalýshyny ustap berý máselelerin retteıdi. Sondaı-aq, konventsııa aıasynda qylmystyń aýyrlyǵyna, onyń jasalý ornyna, suratýlardyń kelip túsý ýaqytyna, azamattyǵyna jáne keıinnen basqa memleketke ustap berý múmkindigine baılanysty sheshimder qabyldaýyn qarastyrady», - dedi N.Súıindikov.
