Franchaızıngtiń kásipkerliktegi úlesi 4 paıyzdy quraıdy - Franchaızıng odaǵynyń tóraǵasy
ALMATY. 22 jeltoqsan. QazAqparat /Erlik Erjanuly/ - Franchaızıng tártibimen jumys jasaıtyn kásiporyndardyń aınalymy Qazaqstanda 1 mıllıard dollardan asady.
Muny Franchaızıng odaǵynyń tóraǵasy Vıacheslav Sıdelnıkov búgin Almatyda ótken «Qazaqstandaǵy franchaızıngtiń 2012 jylǵy damýyn modeldeý» dep atalatyn dóńgelek ústel jıynynda aıtty.
"Qazaqstanda 450 sheteldik kompanııa tanystyrylǵan. Olarmen birge 53-i otandyq kompanııa ózderin franchaızer dep jarııalady nemese bul máseleni qarastyrýda. Aǵymdaǵy jyly olardyń 17-si franchaızer dep jarııalandy. Franchaızıngtiń kásipkerliktegi úlesi qazirgi tańda 4 paıyzdy quraıdy. Byltyr ol 3,5 paıyz bolǵan. Bul salada 25 myńnan astam adam jumys jasaıdy", - deıdi V. Sıdelnıkov. Franchaızıng odaǵy sheteldik kompanııalardyń óz bıznesin Qazaqstanda júrgizýge degen belsendiligin baıqap otyr. Jalpy franchaızıng kásipkerliki damytýda, halyqaralyq saýda men tehnologııalar tansfertinde mańyzdy ról atqarady. Bul mindetti sheshý maqsatynda bıyl "Damý" kásipkerlikti qoldaý qorynda franchaızıngti damytýdyń ulttyq ortalyǵy ashyldy. Onyń baǵdarlamalar jospary jasalyp, Damý qorymen birlesip "Bıznes keńesshi" baǵdarlamasy aıasynda kásipkerlerge bilim berý jumysy júrgizilýde. Sondaı-aq qoldanystaǵy franchaızıng týraly zańdarǵa ózgerister men tolyqtyrýlar engizýdiń jobasy ázirlendi.
