Fototuzaq Tarbaǵataıdaǵy Qyzyl kitapqa engen janýardy túsirip aldy
ASTANA. KAZINFORM — Tarbaǵataı memlekettik ulttyq tabıǵı parkiniń aýmaǵynda ornatylǵan fototuzaqtardyń birine Túrkistan sileýsininiń (Lynx lynx isabellinus) sý iship júrgen sáti tirkeldi.
Bul — ulttyq park aýmaǵynda sırek kezdesetin janýarlardyń turaqty mekendeıtinin jáne tabıǵı ortanyń qolaıly saqtalǵanyn dáleldeıtin mańyzdy derekterdiń biri.
Túrkistan sileýsini — mysyq tuqymdasyna jatatyn iri jyrtqysh ań. Ol kádimgi sileýsinniń Ortalyq Azııada taralǵan túr tarmaǵy bolyp sanalady. Qazaqstanda óte sırek kezdesetindikten, Qazaqstan Respýblıkasynyń Qyzyl kitabyna engizilgen jáne memleket qorǵaýyna alynǵan.
Ornıtolog, memlekettik ınspektor Qabyl Mınardyń aıtýynsha ulttyq parktiń ormandy-taýly alqaptary men jartasty shatqaldary bul ańnyń tirshilik etýine qolaıly meken sanalady. Saq ári jasyryn tirshilik etetin sileýsin adamdardyń kózine óte sırek túsedi. Sondyqtan fototuzaqtarǵa tirkelgen árbir beınematerıal onyń taralý aımaǵyn, minez-qulqyn jáne sanyn baqylaýǵa múmkindik beretin qundy ǵylymı aqparat.
— Tarbaǵataı memlekettik ulttyq tabıǵı parkinde Túrkistan sileýsinin qorǵaý jáne onyń tabıǵı mekenin saqtaý maqsatynda turaqty monıtorıng jumystary júrgizilip otyrady. Sırek kezdesetin jyrtqyshtyń fototuzaqtarǵa tirkelýi park ekojúıesiniń turaqtylyǵyn kórsetip qana qoımaı, elimizdiń bıoalýantúrliligin saqtaýǵa baǵyttalǵan tabıǵat qorǵaý sharalarynyń nátıjeli ekenin de dáleldeıdi, — delingen habarlamada.
Aıta ketelik Іle Alataýynda sırek kezdesetin sileýsinniń qozǵalysy baqylaýǵa alynǵan edi.
