Fototerapııadan jasýsha transplantatsııasyna deıin: Elde vıtılıgo qalaı emdelip jatyr
ASTANA. KAZINFORM — Sońǵy alty jylda Qazaqstanda vıtılıgo aýrýynyń kórsetkishi shamamen 1,2 esege tómendedi, dep habarlaıdy Kazinform tilshisi.
Bul týraly XIX respýblıkalyq «20 óńirdiń dermatovenerologteri, dermatokosmetologteri jáne leprologteri» bilim berý ǵylymı-praktıkalyq konferentsııasynda aıtyldy.
Konferentsııaǵa qatysýshylardyń aıtýynsha, teride aq daqtardyń paıda bolýymen sıpattalatyn sozylmaly aýtoımmýndyq dert — vıtılıgonyń taralýyn azaıtýǵa emdeýdiń zamanaýı ádisterin engizý yqpal etken.
Atalǵan konferentsııa 2015 jyldan beri jyl saıyn ótkizilip keledi jáne kásibı tájirıbe almasatyn mańyzdy alańǵa aınalǵan. Dál osy jıynda keıinnen keńinen qoldanysqa enip, klınıkalyq tájirıbege engizilgen teri aýrýlaryn emdeýdiń jańa ádisteri alǵash ret tanystyrylǵan.
Sonyń biri — vıtılıgony emdeýge arnalǵan tar jolaqty fototerapııa ádisi. Bul tásil búginde Qazaqstanda sátti qoldanylyp keledi. Sonymen qatar, Qazaq dermatologııa jáne ınfektsııalyq aýrýlar ǵylymı ortalyǵy Vıtılıgo jáne teri densaýlyǵy ortalyǵymen birlesip, Ortalyq Azııada vıtılıgony epıdermaldy jasýshalardy transplantatsııalaý ádisimen emdeýdi alǵashqylardyń biri bolyp engizdi.
Bul operatsııa naýqastyń óziniń saý teri jasýshalaryn zaqymdanǵan aımaqqa kóshirýge negizdelgen jáne qazirgi tańda álemdegi eń tıimdi emdeý tásilderiniń biri sanalady.
Mamandardyń aıtýynsha, dál osy zamanaýı tehnologııalardyń engizilýi sońǵy alty jylda Qazaqstanda vıtılıgo aýrýynyń kórsetkishin shamamen 1,2 esege tómendetýge múmkindik bergen.
Sonymen qatar elimizde basqa da teri aýrýlary bar patsıentterge kórsetiletin medıtsınalyq kómekti jetildirý jumystary jalǵasyp jatyr. «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksine sáıkes, bıyl merez, psorıaz jáne qyshyma aýrýlaryn emdeýdi qosa alǵanda, alty klınıkalyq hattamany jańartý josparlanǵan.
Jaqsy nátıjeler kórsetip otyrǵan taǵy bir baǵyt — dermatovenerologııalyq qyzmettiń janynan ashylǵan mamandandyrylǵan kabınetter. Onda podologter, trıhologter jáne stomatologter qyzmet kórsetedi. Sondaı-aq dermatohırýrgııa, dermatoonkologııa, psıhodermatologııa jáne seksýaldyq densaýlyq kabınetteri de turǵyndar arasynda suranysqa ıe.
Mamandardy daıarlaý máselesine de erekshe kóńil bólinip otyr. Qazaqstanda halyqaralyq standarttarǵa saı ázirlengen dermatovenerologııa mamandyǵy boıynsha rezıdentýra baǵdarlamasy jumys isteıdi.
Qazirgi ýaqytta medıtsına qyzmetkerlerin jynystyq jolmen beriletin ınfektsııalardyń aldyn alý, dıagnostıkalaý jáne emdeýdiń zamanaýı tásilderi boıynsha qashyqtan oqytý baǵdarlamasyn jáne arnaıy veb-portaldy ázirleý aıaqtalý satysynda tur. Al atalǵan ınfektsııalardy dıagnostıkalaý men emdeýdiń qazirgi tásilderi orta arnaýly, joǵary, qosymsha jáne joǵary oqý ornynan keıingi medıtsınalyq bilim berý baǵdarlamalaryna engizilgen.
Vıtılıgo — álem halqynyń shamamen 1 paıyzyna tán sozylmaly aýtoımmýndyq teri aýrýy. Ol teride pıgmentsiz aq daqtardyń paıda bolýymen sıpattalady. Aýrý adamnyń ómirine qaýip tóndirmeıdi jáne fızıkalyq zııan keltirmeıdi. Alaıda ol adamnyń psıhoemotsıonaldyq jaǵdaıyna eleýli áser etýi múmkin. Vıtılıgo kez kelgen jasta paıda bolýy yqtımal, biraq kóbine 20 jasqa deıin anyqtalady.
Qazaqstanda jyl saıyn «vıtılıgo» dıagnozymen 15 myńnan astam adam dermatologııalyq medıtsınalyq uıymdarǵa júginedi.
Buǵan deıin Astanada ishek ınfektsııalarymen syrqattaný kórsetkishi 10%-ǵa tómendegeni habarlanǵan bolatyn.
