Fotosýretteri Lývrǵa qoıylǵan qazaqstandyq fotograf Italııaǵa joldama utyp aldy

Ol baıqaýdyń 4 jeńimpazymen birge Neapol qalasyna qyrkúıek aıynda attanatyn boldy.

Uıymdastyrýshylardyń aıtýynsha, Veronıka baıqaýda jeńiske jetken jalǵyz qyz. Ol: «Qazaqstannyń adamdary» atty atalymda úzdik dep tanyldy.

«Avtor týyndylarynyń eń basty baǵyty - adamdar. Adam beınelerine, asa sezimtaldylyq jáne tańǵajaıyp energetıkaǵa degen mahabbat Veronıkaǵa kóptegen baıqaýlarda jeńis ákeldi», - dep atap ótti uıymdastyrýshylar.

Eske sala keteıik, Veronıka Lerner byltyr jazda Exposure Award álemdik syılyǵyn jeńip alyp, óziniń jumystaryn «portret» atalymynda Lývrdaǵy elektrondyq ekspozıtsııada kórsetti. Veronıkanyń eń úzdik fotosýretinde onyń 91 jastaǵy ájesi Bronıslava Iosıfovna Sobolevskaıa beınelengen. Onyń jumysy portrettik janradǵy 200 fototýyndynyń ishinen úzdik shyqqan.

Aıta ketken jón, fotobaıqaý 2015 jyldyń qyrkúıek aıynda «Expo & Women» halyqaralyq uıymynyń ókilderimen uıymdastyrylǵan. Qazaqstannyń 20-dan astam eń úzdik fotograftary tabıǵat, adamdar, astana, mádenıet jáne el taqyryptary boıynsha ózderiniń jumystaryn usyndy. Atalǵan týyndylar Italııadaǵy EXPO-2015 halyqaralyq kórmesinde Qazaqstan pavılonynda kórsetildi. Al keıinirek qazylar alqasynyń oıy boıynsha, bes fotograf jeńimpaz dep tanyldy.

Osylaısha, Konstıntın Kıkvıdze «Qazaqstan tabıǵaty» atalymynda úzdik dep tanyldy. Ol 15 jyldan beri Qazaqstannyń tabıǵatyn túsirýmen aınalysady. Astanalyq turǵyn Arman Baısadyqov «Qazaqstan astanasy» atty atalymda jeńimpaz atandy. Arman joǵary bilimdi Nıý-Iorktiń fotosýret ınstıtýtynda alǵan. Qazirgi ýaqytta landshaft pen feshn-fotosýretterdi túsirýdi áýeze etedi. «Qazaqstan mádenıeti» baǵytynda Ospan Álıdiń týyndylary úzdik shyqqan. Ol ózderiniń sýretterinde boıaýlardy, sezimderdi, ádemilik pen sándilikti barynsha kóp kórsetýge tyrysady. Dıktor ári jýrnalıst Maksım Rojınniń fotojumystary «Meniń elim» atty atalymda jeńip shyqty. Bul - onyń fotobaıqaýlardaǵy alǵashqy jeńisi.

Jeńimpazdardy «Expo & Women» halyqaralyq áriptestiginiń aıasynda kelgen ıtalııalyq delegatsııa marapattady. Jeńimpazdarǵa qyrkúıek aıynda Neapolǵa shaqyrtý tabys etildi. Qazaqstandyq delegatsııanyń Neapolǵa sapary barysynda Italııanyń mádenı erekshelikterimen jáne kórikti jerlerimen tanysý, sonymen qatar ózderiniń eýropalyq áriptesterimen tájirıbe almasý múmkindigine ıe bolady.