Fotosýretińizdi ruqsatsyz jarııalasa, ne isteý kerek
ASTANA. KAZINFORM — Qaskóıler ózge adamdardyń fotosýretin jalǵan akkaýnttar ashý, dáıeksiz aqparat taratý jáne belgili bir áreketterdi kópshilik jappaı qoldap jatqandaı áser qalyptastyrý úshin paıdalanýy múmkin.
Nofake.kz mundaı shemalardyń qalaı jumys isteıtinin anyqtady.
TikTok pen basqa da áleýmettik jelilerde adamdardyń fotosýretterin ruqsat etilmegen mıtıngilerge shaqyrý úshin paıdalanatyn jaǵdaılar kezdesedi. Saldarynan fotoda beınelengen azamattar sol úndeýlerdi qoldap otyrǵandaı nemese tıisti habarlamalardy ózderi taratyp jatqandaı áser qalyptasady.
Mundaı jazbalar kópshilik jappaı qoldaý bildirip jatqandaı jalǵan kórinis qalyptastyrady. Sonymen qatar, ártúrli akkaýnttardan taraǵan habarlamalardy aýdıtorııa qoǵamdyq kózqaras dep qabyldaıdy. Alaıda munyń bári ádeıi jasalýy múmkin jáne ol adamdardyń shynaıy kóńil kúıin kórsetpeıdi.
Fotosýrettiń ózi ondaǵy adamnyń sýretpen birge jarııalanǵan kózqarasty qoldaıtynyn, belgili bir úndeýdi quptaıtynyn nemese qandaı da bir oqıǵaǵa qatysatynyn dáleldemeıdi. Eger adamnyń sýreti onyń kelisiminsiz ózge bireýdiń mátinimen birge jarııalansa, mundaı jazba qoldanýshylardy jańylystyryp, onyń bedeline nuqsan keltirýi múmkin.
Mundaı áreketterden qandaı zańbuzýshylyq belgileri baıqalýy múmkin?
Fotosýrettiń naqty qalaı paıdalanylǵanyna, onymen birge qandaı málimetter jazylǵanyna jáne onyń saldaryna qaraı quqyqtyq baǵa beriledi. Ózge adamnyń beınesin paıdalaný jáne taratý derbes derekter týraly zańnamaǵa, sondaı-aq adamnyń óz beınesine quqyǵyn retteıtin azamattyq zańnama normalaryna qatysty bolýy múmkin. Adam týraly kórineý jalǵan málimet bergen nemese oǵan aıtpaǵan sózi men jasamaǵan áreketti telip, jala japqandar zań aldynda jaýap beredi.
Eger fotosýretter zańǵa qaıshy áreketterdi kópshilik jappaı qoldap jatqandaı jalǵan áser qaldyrý úshin paıdalanylsa, mundaı materıaldardy taratqandar da jeke quqyqtyq baǵalaýdy qajet etýi múmkin.
Qazaqstan zańnamasynda ne qarastyrylǵan?
Qazaqstanda fotosýretterdi paıdalaný máseleleri, atap aıtqanda, Azamattyq kodekspen jáne «Derbes derekter jáne olardy qorǵaý týraly» zańmen retteledi. Bul rette fotosýretti paıdalanýdyń zańdylyǵy ony alý jáne taratýǵa, adamnyń kelisiminiń bolýyna jáne zańda kózdelgen ózge de talaptarǵa baılanysty.
Qazaqstan Respýblıkasynyń Ákimshilik quqyq buzýshylyq týraly kodeksiniń 79-babynda derbes derekter jáne olardy qorǵaý týraly zańnamany buzýdyń jekelegen túrleri úshin jaýapkershilik kózdelgen. Aıyppul mólsheri quqyq buzýdyń quramyna jáne quqyq buzýshynyń sanatyna baılanysty bolady.
Alaıda ózgeniń fotosýretin paıdalaný barlyq jaǵdaıda zań buzý bolyp sanalmaıdy. Jaýapkershilik bar-joǵyn anyqtaý úshin jazbanyń mán-jaıy men zań talaptary eskeriledi.
Fotosýretterińizdi qalaı qorǵaýǵa bolady?
- Qupııalyq baptaýlardy tekserińiz. Fotosýretterińizdi jáne basqa da jeke jazbalaryńyzdy kóre alatyn paıdalanýshylardyń sheńberin shekteńiz.
- Artyq jeke málimetterdi jarııalamańyz. Mekenjaı, jumys orny, qujat derekteri jáne basqa da jeke aqparat sizdiń beıneńizdi teris maqsatta paıdalanýdy jeńildetýi múmkin.
- Fotosýretterińizdiń qaıda jarııalanǵanyn tekserińiz. Ol úshin Google sýretter nemese ıAndeks sýretter servısterindegi sýret boıynsha izdeý fýnktsııasyn paıdalanýǵa bolady. Mundaı izdeý ashyq derekkózderdegi fotosýretterdiń keıbir kóshirmelerin tabýǵa kómektesedi. Alaıda ol barlyq jarııalanymdy anyqtaýǵa kepildik bermeıdi.
- Dálelderdi saqtap qoıyńyz. Fotosýretińizdiń kelisimińizsiz paıdalanylǵanyn anyqtasańyz, skrınshot jasańyz, jazbanyń siltemesin, jarııalanǵan kúnin jáne akkaýnt ataýyn saqtańyz.
- Platforma ákimshiligine shaǵymdanyńyz. Ózge adamnyń atynan áreket etý, qupııalyqty buzý nemese beıneni zańsyz paıdalaný týraly habarlaýǵa arnalǵan qoljetimdi quraldardy paıdalanyńyz.
- Qajet bolsa, quzyrly organdarǵa júginińiz. Eger fotosýretińiz alaıaqtyq jasaý, qorqytý, jalǵan málimetter taratý nemese sizge ózge bireýdiń kózqarastary men áreketterin telý úshin paıdalanylsa, polıtsııaǵa júginýge nemese zańgerden keńes alýǵa bolady.
Áleýmettik jelidegi ashyq profılden alynǵan sýretti paıdalanyp, adamǵa ózi aıtpaǵan sózdi nemese qoldamaıtyn pikirdi tańýǵa bolmaıdy. Bireýdiń sýreti onyń jazbadaǵy pikirmen kelisetinin bildirmeıdi. Sondyqtan mundaı aqparatty birden shyndyq dep qabyldamaı, aldymen teksergen jón. Zań buzý anyqtalsa, tıisti organdarǵa habarlaý qajet.
Aıta ketelik ásker týraly feık bir jyldan keıin qaıta taraǵan edi.
