FOTOREPORTAJ: QR Premer-Mınıstri Baqytjan Saǵyntaevtyń Amerıka Qurama Shtattaryna jumys sapary

B. Saǵyntaev Nıý-Iorkke kesh batqanda jetti. Astanadan ushyp jetýge shamamen 14 saǵat ýaqyt ketti.

Qazaqstan Premer-Mınıstri B. Saǵyntaevtyń kestesindegi alǵashqy kezdesýlerdiń biri Nıý-Iorkte AQSh-tyń asa iri qarjy ınstıtýttarynyń: Citigroup, Mastercard, Berkley, Morgan Stanley, Black Rock, Goldman Sachs, sondaı-aq álemdik reıtıngtik agenttikteri: Moody's, Standard&Poor's, Greylock Capital, Guggenheim International, Alliance Bernstein, Public Capital Advisors, Business Council of International Understanding ókilderimen júzdesýi boldy.

Kezdesýge qatysýshylar álemdik ekonomıka jáne Qazaqstannyń ekonomıkalyq saıasatynyń damýynyń ózekti máselelerin, sondaı-aq birlesken jobalardy júzege asyrý, ınvestıtsııalar tartý, ınfraqurylymdyq jobalardy qarjylandyrý jáne aktıvterdi basqarý múmkindikterin talqylady.

Qazaqstan Premer-Mınıstri B. Saǵyntaev «Chevron» korporatsııasynyń Eýrazııalyq aımaq boıynsha basshysy T. Levımen kezdesti.

Kezdesý barysynda taraptar munaı-gaz salasynda yntymaqtastyqty odan ári keńeıtý máselelerin talqylady.

Sodan keıin Baqytjan Saǵyntaev Nıý-Iork qalasynyń eks-meri Rýdolf Djýlıanımen kezdesti.

Dıalog aıasynda telekommýnıkatsııalyq ınfraqurylymdy damytý salasyndaǵy ózara is-qımyl jáne yntymaqtastyq máseleleri talqylandy.

QR Premer-Mınıstri «Citigroup» kompanııasynyń prezıdenti Djeıms Foresemen kezdesti.

Taraptar qarjy-banktik ózara is-qımyldy tereńdetý máselelerin, sondaı-aq Qazaqstannyń ınvestıtsııalyq múmkindikterin talqylady.

Budan keıin Baqytjan Saǵyntaev «WR Berkley Group» saqtandyrý kompanııasynyń tóraǵasy B. Barklımen jáne «Robotti & Company Advisors LLC» kompanııasynyń basshysy I. Shvartsmanmen kezdesý ótkizdi. Onyń barysynda saqtandyrý jáne elimizdiń bank salasyna ınvestıtsııalar tartýdyń zamanaýı tetikteri talqylandy.

Budan ári QR Premer-Mınıstri B. Saǵyntaev «Bloomberg» kompanııasynyń negizin qalaýshy jáne Nıý-Iork qalasynyń eks-meri M. Blýmbergpen kezdesý ótkizdi.

B. Saǵyntaev M. Blýmbergpen Qazaqstannyń qarjy naryǵyn jáne «Astana» Halyqaralyq qarjy ortalyǵyn damytý salasyndaǵy yntymaqtastyq máselelerin talqylady. Kezdesýdiń mańyzdy nátıjesi Astanada Blýmberg telearnasy men keńsesin ashý týraly kelisim boldy.

Sodan keıin Baqytjan Saǵyntaev «GE Transportation» kompanııasynyń bas atqarýshy dırektory Dj. Mıllermen kezdesti.

Áńgimelesý barysynda taraptar gaz salasyndaǵy yntymaqtastyq máselelerin talqylady. Aıta keter bolsaq, GE Transportation Qazaqstannyń munaı-gaz keshenin damytýǵa, atap aıtqanda Qarashyǵanaq, Teńiz jáne Qashaǵan jobalarynda belsendi qatysady, onda kompanııanyń biregeı jabdyǵy tabysty qoldanylady.

Sondaı-aq, Nıý-Iorkte Baqytjan Saǵyntaev AQSh-tyń jetekshi kompanııalarymen: «I Scuared Capital», «General Electric», «Grace, Robotti & Company Advisors», «AGCO», «AES», «Black and Veatch», «American Industrial Acquisition Corporation» Qazaqstan ekonomıkasyna ınvestıtsııalar men jańa tehnologııalar tartý máselelerin talqylady.

«OSI Systems», «Pfizer» jáne «GE Transportation» kompanııalarymen kezdesýler aıasynda Qazaqstanda tehnologııalyq jabdyqtar óndirisine ınvestıtsııalar tartý týraly, al «Rahal Foods» kompanııasymen organıkalyq azyq-túlik óndirisi turǵysyndaǵy yntymaqtastyq týraly kelisim jasaldy.   

QR Premer-Mınıstri «OSI Systems» kompanııasynyń atqarýshy vıtse-prezıdenti A. Mehramen kezdesý ótkizdi.

Aıta ketken jón, «OSI Syhstems» kompanııasy áýejaıda júk tekserýge arnalǵan rentgen apparattary men metall detektorlary sııaqty qaýipsizdik jáne beınebaqylaý júıelerin, anestezııa júıelerin, elektrondy-optıkalyq jabdyqtardy ázirleýmen aınalysady.

Kompanııanyń Astana qalasynyń áýejaıy men qazaqstandyq keden beketterin Rapiscan skanerleý júıelerimen jabdyqtaý júrgizetindigi týraly kelisimge qol jetkizildi.

Odan keıin B. Saǵyntaev «Pfizer» kompanııasynyń vıtse-prezıdenti M. Gettlermen kezdesti. Qazaqstanda vaktsınalar óndiretin zaýyt salý týraly kelisimge qol jetkizildi.

 

Budan ári Premer-Mınıstr ekonomıst N. Rýbınımen mańyzdy ári qyzyqty kezdesý ótkizdi. Jahandyq jáne aımaqtyq ekonomıkalyq damý taqyryby boıynsha pikir almasý ótti.

 

Tyǵyz kestege qaramastan QR Premer-Mınıstri sol keshte San-Frantsısko qalasyna, Kremnıı alqabyna bardy, onda birqatar mańyzdy kezdesýler ótkizý josparlanǵan bolatyn.

Kelesi kúnniń tańerteńinde QR Premer-Mınıstri «Cisco» keńsesin aralady jáne kompanııanyń Dırektorlar keńesiniń tóraǵasy Dj. Chamberspen kezdesý ótkizdi.

«Cisco» kompanııasynyń negizi 1984 jyly qalanǵan jáne qazirgi ýaqytta keń kólemdegi jeli jabdyqtaryn shyǵarady, olardyń qatarynda: marshrýtızatorlar, IP-telefonııa ónimderi, Ethernet-kommýtatorlar, jeli qaýipsizdigi qurylǵysy, Wi-Fi ruqsat núktesi, optıkalyq kommýtatsııa platformalary, ATM-kommýtatorlar t.b. bar.

Qazaqstan úshin osyndaı ataqty álemdik kompanııamen yntymaqtastyq Memleket basshysynyń Joldaýynda usynylǵan el ekonomıkasyn jańǵyrtý boıynsha mindetter turǵysynda erekshe mánge ıe.

Osynda «Tsıfrlyq Qazaqstan» baǵdarlamasyn júzege asyrý aıasynda «Zerde» AQ men «Cisco» kompanııasy arasynda yntymaqtastyq ornatý týraly memorandýmǵa qol qoıyldy.

San-Frantsıskoda B. Saǵyntaev ataqty ekonomıst A. Laffermen kezdesti. Kezdesý barysynda jahandyq ekonomıkadaǵy ózekti úrdister, zamanaýı salyq saıasatynyń erekshelikteri talqylandy.

Sodan keıin QR Premer-Mınıstri Robomatter Inc. prezıdenti Skıp Smıtpen kezdesý ótkizdi, onyń barysynda kompanııanyń ınnovatsııalyq bilim berý baǵdarlamalaryn Qazaqstanda, jastardy kompıýterlik ǵylymdarǵa, baǵdarlamalaýǵa jáne robotty tehnıkaǵa oqytý jáne daıarlaý úshin qoldaný múmkindigin talqylady.

Odan keıin, Baqytjan Saǵyntaev «Tesla Motors» keńsesine baryp, onda robotty tehnıka men baǵdarlamalaýǵa negizdelgen, elektromobılder óndirisiniń tolyq kezeńimen tanysty.

Budan keıin Baqytjan Saǵyntaev «Shevron» kompanııasynyń tóraǵasy Djon Ýotsonmen kezdesti. Áńgimelesý barysynda taraptar munaı ónimderiniń álemdik naryǵyn damytýdyń qazirgi jaǵdaıy men boljamdaryn, elimizdegi munaı-gaz jobalaryndaǵy yntymaqtastyqty keńeıtý máselelerin, sonymen qatar Qazaqstandaǵy Bolashaq Keńeıý jobasyn talqylady.

«Barlyq osy 25 jyl ishinde «Chevron» elmen birge ósti, degenmen biz Qazaqstannyń tek ótkeni emes, sondaı-aq bolashaǵy da bolǵymyz keledi», - dedi Dj. Ýotson.

QR Premer-Mınıstri «IBM Watson West» ortalyǵyn aralady, onda Baqytjan Saǵyntaevqa kompanııanyń jasandy zerde, beıne men saraptaýdy tanyp bilý salasyndaǵy ázirlemeleri men «aqyldy» qalalarǵa arnalǵan ınnovatsııalyq sheshimderi tanystyryldy.

Sapar qorytyndysy boıynsha «IBM» kompanııasy men «ITP» DKQ arasynda Astana qalasynda kelesi baǵyttar: qarjylyq tehnologııalar, «Aqyldy qala» boıynsha tehnologııalar jáne qala qurylysy men ony paıdalanýdy basqarýǵa arnalǵan tehnologııalar boıynsha qoldanbaly zertteýlerge arnalǵan zerthana qurý boıynsha Memorandýmǵa qol qoıyldy.

Sondaı-aq, Baqytjan Saǵyntaev «Autodesk» kompanııasynyń keńsesine baryp, kompanııa vıtse-prezıdenti Devıd Kreınmen kezdesti.

Taraptar Qazaqstanda Autodesk quzyret ortalyǵyn qurý máselesin talqylady, onyń aıasynda BIM (Building Information Modeling - ǵımaratty aqparattyq úlgileý) salasynda tsıfrlyq standarttar engiziletin bolady.

Sonymen qatar, «Autodesk» kompanııasymen birlesip, qazaqstandyq jańa qurylys materıaldarynyń sapasyn anyqtaý jáne sertıfıkattaý zerthanasy qurylatyn bolady. Kompanııany aralaý nátıjeleri boıynsha «Autodesk» pen «ITP» DKQ arasyndaǵy yntymaqtastyq týraly Memorandýmǵa qol qoıyldy.

QR Premer-Mınıstriniń kestesindegi asa mańyzdy sharalardyń biri - «Project: Collider» tehnologııalyq forýmy boldy, onda B. Saǵyntaev ınnovatsııalar salasyndaǵy álemdik kóshbasshy kompanııalardy QR ekonomıkasynyń jańǵyrtylý úderisine belsendirek qatysyp, ınvestıtsııa quıýǵa shaqyrdy. Baıandamanyń tolyq mátinimen myna jerde tanysa alasyz.

«Project: Collider» forýmy - tehnologııalyq ınvestıtsııalar salasyndaǵy aǵymdaǵy trendterdi talqylaý úshin jetekshi ınvestorlardyń, kásipkerlerdiń jáne memleket qyzmetkerleriniń basyn qosatyn shara.

Bıyl sharaǵa «Citi Ventures» kompanııasynyń vıtse-prezıdenti V. Cheng, «Global Catalyst Partners» negizin qalaýshy K. Elahıan, «Coca-Cola» ınnovatsııalar jónindegi dırektory A. Boem, «Intel Capital» seriktesi S. Dang, «Sentient Technologies» basshysy B. Hodjıat, «Google Development Group» basshysy D. Feld, «SGS Global Holdings» tóraǵasy S. Stevanovıch, «Learn Capital» basqarýshy seriktesi R. Hatter, «General Electric» bas tehnıkalyq dırektory D. Bartlett, «ABB Technology» basqarýshy dırektory G. Allen qatysty.

Sondaı-aq, «Project: Collider» forýmy aıasynda B. Saǵyntaev AQSh-tyń iri ІT-kompanııalarynyń ókilderimen birqatar kezdesýler ótkizdi.

QR Premer-Mınıstri «Bridge West Group» Dırektorlar keńesiniń Tóraǵasy Ması Taebımen kezdesý ótkizdi, onyń qorytyndysy boıynsha «Qazaqtelekom» AQ-men Memorandýmǵa qol qoıyldy, onda Internetke qoljetimdilik jelilerin aýqymdy damytý maqsatynda amerıkalyq kompanııanyń jabdyqtaryn satyp alý boıynsha múmkin yntymaqtastyq kózdelgen.

Sodan keıin «Learn Capital» Basqarýshy seriktesi G. Maýromen kezdesý ótti, onyń qorytyndysy boıynsha QR BǴM «Aqparattyq-analıtıkalyq ortalyq» AQ-men «charterlik mektepter» dep atalatyn úlgi boıynsha ınnovatsııalyq bilim berýdiń pılottyq jobasyn damytý boıynsha yntymaqtastyq týraly Memorandýmǵa qol qoıyldy.

Sońynda B. Saǵyntaev «Sound Hound» kompanııasynyń tóraǵasy K. Mohaermen kezdesý ótkizdi, ol aqparattyq tehnologııalar salasyndaǵy birlesken jobalardy iske asyrýda Qazaqstannyń áleýetti seriktesi bolýy múmkin.

Qazaqstan Premer-Mınıstri B. Saǵyntaevtyń AQSh-qa jumys sapary aıasynda Kremnıı alqabynda Qazaqstannyń Ókildigin ashý týraly kelisimge qol qoıyldy.

«Zerde» ulttyq aqparattyq-kommýnıkatsııalyq holdıngi», «Innovatsııalyq tehnologııalar parki» Derbes klasterlik qory men GVA Capital venchýrlik qory arasynda osyndaı Memorandýmǵa qol qoıyldy.

Innovatsııalyq Ókildik Kremnıı alqabynda QR tehnologııalyq startaptaryn damytý platformasymen qamtamasyz etedi, QR-daǵy kásipkerlik pen ǵylymdy damytýǵa eń úzdik tehnologııalyq ıdeıalar men úderisterge qoljetimdilikpen qamtamasyz etedi.Sondaı-aq, QR-nyń iri korporatsııalaryna álemdik deńgeıde ınnovatsııalyq ózara is-qımyl jasasý, biregeı aqparat pen resýrstardyń qoljetimdi bolý múmkindigi bar.

Sonymen qatar, QR Premer-Mınıstri B. Saǵyntaev «DFJ» kompanııasynyń keńsesine baryp, onyń negizin qalaýshy T. Drapermen kezdesti.

«DFJ»-tyń birqatar qazaqstandyq kompanııalarǵa qoldaý kórsetýi týraly ýaǵdalastyqqa qol jetkizildi. Aıta ketý kerek, «DFJ» kompanııasy tehnologııalar salasyndaǵy damý satysyndaǵy jáne bastapqy satydaǵy jobalardy ınvestıtsııalaýǵa baǵdarlanǵan.

Baqytjan Saǵyntaev Kremnıı alqabynyń ınnovatsııalyq ortalyǵynyń keńsesine baryp, sarapshylar tobymen jáne ortalyq prezıdenti A. Kýnovpen kezdesti.

B. Saǵyntaev «Plug and Play Tech Center» kompanııasynyń keńsesine bardy.

«Plug and Play Tech Center» - startaptardy damytýǵa mamandandyrylǵan bıznes-akselerator. Ol 300-den astam startaptardy biriktiredi jáne atalǵan ınkýbatordyń qorǵaýyndaǵy kompanııalardy irikteýge júıeli túrde qatysatyn 170-ten astam ınvestormen seriktes.

Odan keıin QR Premer-Mınıstri «Jabil» kompanııasynyń keńsesine bardy, ol túrli salalardaǵy jahandyq tehnologııalyq korporatsııalarǵa elektronıkalardy jobalap, ázirleý boıynsha keshendik qyzmetter kórsetetin álemdegi eń iri óndiristik kompanııalardyń biri.

 

Sonymen qosa, Baqytjan Saǵyntaev «Google» keńsesine bardy, onda kompanııanyń ІT-salasyndaǵy qazirgi ázirlemelerimen tanysty, sonymen qatar qyzmetkerlermen Qazaqstanǵa qajetti jobalardy talqylady.

Baqytjan Saǵyntaev «Microsoft» korporatsııasynyń ujymdyq vıtse-prezıdenti D. Levınmen kezdesý ótkizdi. Kezdesý barysynda kompanııanyń baǵdarlamalyq sheshimderin QR-nyń shaǵyn jınaqty mektepterine engizý máselesi talqylandy.

Osylaısha QR Premer-Mınıstri Baqytjan Saǵyntaevtyń Amerıka Qurama Shtattaryna jumys sapary aıaqtaldy. Ótkizilgen kezdesýler men qol qoıylǵan qujattar Qazaqstanǵa elimizde tsıfrlyq ınfraqurylymdy damytýǵa jaǵdaı jasaýǵa, jańa ındýstrııalardy taratýǵa, Indýstrııa 4.0 elementterin ulttyq ekonomıkaǵa ıntegratsııalaýǵa kómek beredi.