Fotoreportaj: Keıki batyr rýhyna arnalǵan qazaq kúresi jarysy aıaqtaldy
QOSTANAI.QazAqparat - Qostanaı oblysynda Keıki batyr súıegin jerleý rásimi qurmetine oraı qazaq kúresinen «Túıe palýan» jarysy ótkizildi, dep habarlaıdy QazAqparat tilshisi
Keıki batyr kesenesi ornalasqan Amangeldi aýdanyna qarasty Tasty aýylynda qazaq kúresinen respýblıkalyq jarys uıymdastyryldy. Palýandar dodasyna elimizge tanymal alyptar jıyldy.
"Qazaqstan barysy" týrnıriniń 2014 jylǵy jeńimpazy Muhıt Tursynov birinshi kezdesýinde Jankeldın aýdanynyń palýanyn aıqyn basymdyqpen utty. Sonan soń astanalyq tájirıbeli sportshy, dzıýdodan elimizdiń birneshe dúrkin chempıony Sergeı Pakty tize búktirdi.
Al taǵy bir topjarǵan palýan Aıbat Seıten alǵashqy aınalymnan súrinbedi. Ekinshi kezeńde oǵan grek-rım kúresinen Azııa chempıony Talǵat Jıentaev qarsy turdy. Degenmen, talaı dodanyń shańyn qaqqan Aıbat Seıten qarsylasyn alyp urdy.
«Arqalyq barysy» Ǵabıt Balǵynbaev ta babynda ekenin kórsetti. Ol da bastapqy qarsylastaryn aıqyn utyp, jartylaı fınalǵa shyqty. Ǵabıt boz kilem ıesi, amankeldilik Rysbek Dáýitpen kezdesti. Bul joly da arqalyqtyq jigittiń baǵy jandy. Jurtshylyq Muhıt Tursynov pen Aıbat Seıtenniń kúresin kútken-di. Osylaı syralǵy qarsylastar taǵy jolyqty. Birge jattyǵyp júrgen bilektilerdiń bási Aıbattyń paıdasyna sheshildi.
Úshinshi oryn úshin ótken kezdesýde Muhıt Tursynov Rysbek Dáýitti jeńdi. Birinen-biri asqan saqa palýandardyń arasynan Arqalyq qalasynan kelgen Ǵabıt Balǵynbaev ozdy. Ol Aıbat Seıtendi upaı sanymen utyp, «Túıe palýan» atandy.
Osylaısha, Amankeldi aýdanynyń ákimi Nurjan Ótegenov jarys jeńimpazy Ǵabıt Balǵynbaevqa avtokóliktiń kiltin tapsyrdy.
