Fotoreportaj: qary joq qysqy Olımpıada qalasy – Mılan
MILAN. KAZINFORM – 2026 jylǵy qysqy Olımpıada oıyndary Italııanyń Mılan qalasyn álem nazaryndaǵy basty ortalyqtardyń birine aınaldyrdy. Ádette sán men dızaınnyń, iskerlik ómir men tarıhı arhıtektýranyń sımvoly sanalatyn qala bul joly sport merekesiniń tynysyn sezinip jatyr. Osy oraıda, Kazinform tilshisi Olımpıadanyń negizgi jarys aımaǵyn óz kózimen kórip, tanysyp qaıtty.
Mılanǵa kelgen sátten-aq kóktemniń lebi seziledi. Qala kóshelerinde qar joq, shóp kógerip tur.
Aýa raıynyń jyly bolýyna baılanysty turǵyndar qalyń kıinbeıdi, velosıped pen moped mingen jastar kóp. Qala turǵyndarynyń aıtýynsha, 2026 jyldyń alǵashqy qary qańtardyń sońynda jaýǵanymen, kóp uzamaı erip, arty jańbyrǵa ulasqan.
Tarıhy tereń Mılan – Eýropadaǵy eń iri qalalardyń biri. Sonymen qatar, qala saýda, ónerkásip, mýzyka, sport, ádebıet, óner jáne buqaralyq aqparat quraldary salalarynda yqpaly zor, álemge sán men dızaın astanasy retinde tanymal.
Áıgili mýzykalyq jáne operalyq dástúri bar Mılan – La Skala teatry men Djýzeppe Verdı syndy uly kompozıtordyń altyn besigi. Qala sondaı-aq kóptegen mýzeı, ýnıversıtet, akademııa, saraı, shirkeý jáne kitaphanalarymen de belgili. Álemge áıgili «Mılan» jáne «Internatsıonal» fýtbol klýbtary oıyndaryn qysqy Olımpıadanyń ashylý saltanaty ótken «San-Sıro» stadıonynda ótkizedi.
Olımpıada kúnderi Mılan kóshelerinde merekelik atmosfera aıqyn seziledi. Pıatstsa-del-Dýomo (Piazza del Duomo) syndy ortalyq alańdar men tarıhı ǵımarattar Olımpıada nyshandarymen bezendirilip, álemniń túkpir-túkpirinen kelgen jankúıerler men týrısterdi qarsy alýda. Qalanyń zamanaýı kelbeti men ǵasyrlar qoınaýynan syr shertetin sáýleti qysqy sport rýhymen úılesim tapqan.
Mılan qysqy Olımpıada aıasynda muz sporttarynyń negizgi ortalyqtarynyń biri sanalady. Munda mánerlep syrǵanaý, hokkeı, short-trek jáne konkımen júgirý sııaqty sport túrlerinen 30 medal jıyntyǵy sarapqa salynady. Olımpıada arenalary halyqaralyq standarttarǵa saı jabdyqtalyp, sportshylar men kórermenderge qolaıly jaǵdaı jasalǵan.
Qalanyń kúndelikti ómiri de Olımpıada yrǵaǵyna beıimdelgen. Metro men qoǵamdyq kólikterde Olımpıadaǵa kelgen BAQ ókilderine tegin qatynaý múmkindigi qarastyrylǵan. Eriktiler sheteldik qonaqtarǵa baǵyt-baǵdar kórsetip, arenalarǵa adaspaı jetýine kómektesip júr. Dámhanalar men meıramhanalarda Olımpıada sımvolıkasy keńinen qoldanylyp, jankúıerlerge arnalǵan arnaıy mázir usynylyp jatyr.
Qysqy Olımpıada Mılan úshin tek iri sporttyq doda ǵana emes, qalanyń halyqaralyq bedelin arttyryp, Italııanyń uıymdastyrýshylyq áleýetin aıqyndaıtyn mańyzdy oqıǵaǵa aınalyp otyr.
