Fotoreportaj: Bas múftı aıt namazyn oqyp, elimizdiń amandyǵy úshin duǵa jasady
ASTANA. KAZINFORM — Bıyl aıt namazy Mańǵystaý, Batys Qazaqstan jáne Atyraý oblystarynda tańerteń saǵat 8:00–de, Qyzylorda, Aqtóbe, Qostanaı, Soltústik Qazaqstan oblystarynda 7:30–da, al qalǵan óńirlerde 7:00–de bastaldy. Búgin Astana meshitterindegi Aıt namazyna turǵyndar tańǵy saǵat 6 bolmaı aǵyla bastady.
Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordadaǵy respýblıkalyq Bas meshitte aıt namazyn júrgizip, jamaǵatqa ýaǵyz aıtty.
Bas múftı jamaǵatty oraza aıtpen quttyqtap, musylmannyń Ramazannan keıingi rýhanı jaǵdaıy qandaı bolýy kerektigine toqtaldy.
— Osydan biraz ýaqyt buryn ǵana oraza aıyn asyǵa kútip, sol aıǵa aman-esen jetsek dep júrgen edik, endi mine, qasıetti Ramazan aıyn da támamdap, onyń artynsha aıt kúnimen qaýyshyp otyrmyz. Ramazan aıy — jylyna bir márte kelip, jan dúnıemizdi tazartyp, nápsimizdi tárbıeleıtin, boıymyzda taqýalyq qalyptastyratyn rýhanı ustaz. Bul qasıetti aıda boıymyzǵa jınaǵan rýhanı azyǵymyz bir jyl boıǵy rýhanı deńgeıimizge áser etýi qajet. Barshamyz ótken Ramazan aıynda oraza ustadyq. Taraýyq namazyn oqý úshin meshitke, jamaǵat namazyna keldik. Muqtajdarǵa zeket-sadaqalarymyzdy berdik. Endigi másele, ramazannan keıin de osy rýhanı kúıimizdi joǵaltpaý, - dedi QMDB tóraǵasy.
Budan keıin Bas múftı jamaǵatpen birge aıt namazyn oqyp, elimiz ben jerimizdiń amandyǵy úshin arnaıy duǵa jasady.
Aıt namazynan soń Bas meshitke jınalǵan qala turǵyndary ulttyq sport túrlerinen saıysqa tústi. Atap aıtsaq, «Qol kúresi», «Arqan tartys», «Asyq atý» sekildi ulttyq oıyndardan jastar ózara básekege tústi.
Búgin Bas meshittegi aıt namazyna kelgen qala turǵyna Ońdasyn Ábenuly elimizdiń ál-aýqatynyń kúsheıýine, Táýelsizdiktiń nyǵaıa túsýine duǵa-tilik jasaǵanyn aıtty.
— Duǵa-tilektermiz qabyl bolyp, qazaq eliniń aýyzbirligi bekemdelip, yntymaǵymyz nyǵaıa tússin, ekonomıkamyzdyń qýaty arta bersin. Qazaqstannyń Kók Týy jelbireı bersin. Óskeleń urpaq óz ana tilinde taza sóılep, ádet-ǵurpyn myqty ustanyp, elimizdiń damýyna qyzmet etsin dep tileımin. Jyl saıyn Oraza aıt namazynda, Qurban aıt namazynda osyny tilep otyramyn. Jastardyń peıiline kóńilim tolady, jastarǵa razymyn, — dedi Ońdasyn Ábenuly.
Atap aıtqanda, búgin Memleket basshysy Qasym-Jomart Toqaev Qazaqstan halqyn Oraza aıt merekesimen quttyqtady.
Eske salsaq, bıylǵy orazanyń birinshi kúni 1 naýryzda bastaldy.
Ramazan orazasy 29 kúnge sozyldy. 26 naýryzdan 27 naýryzǵa qaraǵan túni — Qadir túni.
Oraza aıt 30 naýryzǵa, al Qurban aıt kúnderi 6-8 maýsym aralyǵyna túsedi.
Sonymen qatar elimiz boıynsha aıt namazynyń kestesi jarııalandy.
