Fotoreportaj: Almatyda Jeńistiń 80 jyldyǵyna arnalǵan kórme ashyldy
ALMATY. KAZINFORM - Qazaqstan Respýblıkasynyń Memlekettik ortalyq mýzeıinde «Jeńis tarıhy: ár sýret bir taǵdyr» kórmesi ashyldy.
Kórme maıdangerler men tyl eńbekkerleriniń esimderin ult jadynda saqtaý, qurmet kórsetý maqsatynda mýzeı qoryndaǵy ekinshi dúnıejúzilik soǵystyń tarıhyn beıneleıtin jádigerler negizinde uıymdastyrylǵan. Mýzeı qyzmetkerleriniń aıtýynsha, kórmede qoıylǵan árbir fotosýret Jeńiske úles qosqan adamdardyń jeke taǵdyryn ashady.
- Bul soǵys árbir qazaq otbasyna áser etti. Jeńis úshin qazaq jaýyngerleri aıanbaı aıqasty, tylda besiktegi baladan eńkeıgen qarttarǵa deıin ter tógip, eńbek etti. Sondyqtan bul Jeńis qazaq halqy úshin de úlken mán mańyzy bar. Soǵystyń aıaqtalǵanyna 80 jyl ótse de, biz tarıhty tereń bilmeı jatyrmyz. Ásirese, áskerı kadrlar týraly málimetter az. Sondyqtan entsıklopedııalar, anyqtamalar daıyndaý kerek, - dedi Memlekettik ortalyq arhıviniń dırektory Sábıt Qamytbekuly.
Mýzeı qabyrǵasynda maıdangerlerdiń fotoqujattary, marapattary qoıylǵan. Atap aıtqanda, atqysh-ushqysh, kishi serjant Baqtyoraz Beısekbaevtyń marapattary, Brest qamalynyń qabyrǵasynan alynǵan kirpish fragmenti, T.Bıgeldınov, S.D.Lýganskıı, M.Ǵabdýllın, S.Nurmaǵambetov, A.Hýsaınov, T.Qaýmbaev jáne basqa da tulǵalardyń jeke muraǵattarynan alynǵan fotoqujattar bar.
Іs-shara aıasynda soǵys kezinde talaı adamnyń ómirin aman alyp qalǵan dárigerlerge arnalǵan «Ardagerler sherýi» buryshy ashyldy. Onda E.Sadýaqasova, R.Ysqaqova, M.Smırnova-Kýharskaıa jáne ózge de jeńiske úles qosqan qaharman dárigerlerdiń marapattary, fotosýretteri men qujattary kópshilik nazaryna usynyldy.
Kórme aıasynda maıdangerler men tyl eńbekkerleriniń zattaryn mýzeı qoryna qabyldaýǵa arnalǵan «Mýzeıge syı» sharasy ótkizildi.
Eske salaıyq, buǵan deıin Qaraǵandy oblysynda soǵys ardagerleri Jeńistiń 80 jyldyǵyna 3 mln teńgeden alatynyn jazǵanbyz.