Fotograftyń mindeti sýretti sóıletý – Talǵat Tánibaev

PETROPAVL. QazAqparat – Petropavlda óńirge belgili fototilshi Talǵat Tánibaevtiń kórmesi ashyldy. «Týǵan jer – tuǵyryń, týǵan el – qydyryń» atty fotokórme fotograftyń 18 jylǵy eńbeginiń qorytyndysy ispettes. QazAqparat tilshisi kásibı mamandy áńgimege tartty.

Soltústikqazaqstandyq fotograf Talǵat Tánibaevtiń alǵashqy fotokórmesin «Qyzyljar» art-ortalyǵynan tamashalaýǵa bolady. Munda izdenis pen kóp jylǵy eńbektiń jemisi – erekshe sýretter oryn tepken. Kimdi bolsyn beıjaı qaldyrmaıtyn bul týyndylar Qyzyljar óńiriniń ásem tabıǵaty, onyń eńbekqor da, daryndy, aqjarqyn turǵyndary jaıynda syr shertip, jalpy, ómirdiń qas-qaǵym jarqyn sátterimen bólisedi.

Talǵat Tánibaev oblystyq «Soltústik Qazaqstan» gazetiniń fototilshisi. Onyń sýretteri merzimdi baspasózdiń mazmunyn ashyp, shyraıyn keltiredi. Óńirdegi aıtýly oqıǵa bolsyn, eńbegimen abyroı bıiginen kóringen tulǵa bolsyn, tabıǵattyń ǵajaıyby bola ma – munyń eshqaısysy fotograftyń obektıvinen tys qalǵan emes.

«Gazettiń fototilshisi bolǵandyqtan is-sharalarǵa, túrli jıyndarǵa kóp baramyn. Únemi oqıǵa ornynda júremin. Jumysym ózime unaıdy. Bul salada eńbek etkenime bıyl 18 jyl bolypty. Negizgi mamandyǵym – ınjener-mehanık. Bala kezimde fotograf bolamyn dep oılamappyn. Desek te, shyǵarmashylyqqa jaqyn boldym. Jaqsy sýret salamyn.

Jergilikti telearnada naǵashym eńbek etti, men onyń jumysyna qyzyǵyp, jıi baratynmyn. Meniń osy salaǵa kelýime sol kisi sebepker boldy. Qyzyǵýshylyǵymdy baıqap, baǵyt-baǵdar berdi, teleoperatorlarǵa qosyp, olardan úırenýime kómektesti. Qazirgi jetistigim – eńbekqorlyq pen izdenimpazdyq nátıjesi», - deıdi Talǵat Tánibaev.

Fotograftyń aıtýynsha, qazir onyń qorynda júzdegen fotosýret bar. Al alǵashqy avtorlyq kórmesine sonyń eń úzdik degen 30-y ǵana qoıyldy.

«Uıaly telefonnyń paıda bolýymen qazir árkim fotoǵa túsire beredi. Biraq, foto sóıleýi kerek, ol kórgen adamǵa emotsııa syılaýy tıis. Sýretke qarap adam túsinýi kerek ne bolyp jáne qaıda bolyp jatqanyn. Fotoǵa túsirgende jaryq ta, rakýrs ta, túsirip jatqan obektiń de mańyzdy. Máselen, sporttyq is-sharany túsiretin bolsań belgili bir sátti qalt jibermeýiń kerek. Al peızajdy túsirýdiń óz qyr-syry bar.

Áleýmettik jelige salynatyn sýret bir basqa da, gazet-jýrnal betinde shyǵatyn fotonyń óz talaptary bar. Gazette jarııalanatyn reportajdy bir ǵana kadrmen berýge bolady. Reportajdyq kadrdy uıymdastyrýǵa, ne bolmasa oıdan shyǵaryp túsirýge bolmaıdy. Bul, árıne, sheberlikti, tájirıbeni, únemi kásibı shyńdalýdy jáne orasan eńbekti qajet etedi. Fotograftyń kózqarasy erekshe bolýy mańyzdy, basqalar mán bermegendi, kópshilik kórmegendi baıqap, obektıvine alýy kerek», - deıdi Talǵat Tánibaev.

Talǵattyń muraǵatynda peızaj da, portret te, reportaj da bar. Desek te, aýylda týyp, balalyq shaǵy aýylda ótkendikten bolar, oǵan aýyldyń turmysyn, ulttyq naqyshyn joǵaltpaǵan qazaqy eldimekenderdi túsirý janyna jaqyn.

«Aýdandarǵa, aýyldarǵa jıi issaparmen shyǵyp turamyz. Shalǵaıdaǵy eldimekenderge barǵan unaıdy. Mundaıda men barynsha tumsa tabıǵatty, ádemi jerlerin, erekshe adamdardy túsirýge tyrysamyn. Men belgili bir stıldi ustanbaımyn, qalaı kóremin, solaı túsiremin. Keı fototilshiler kadrdy aldyn ala josparlaıdy, al men osy ýaqytta qas-qaǵym sátti túsirgendi unatamyn.

Jalpy, jaqsy fotograf bolý úshin qymbat fotoapparattyń bolýy jetkiliksiz. Adamnyń óz kózqarasy bolýy tıis. Búginde fotograf kóp. Biraq, óz qoltańbasy bar kásibı mamandar sanaýly», - deıdi fotograf.

Mamannyń aıtýynsha, keıde sátti kadr úshin biraz eńbektenýge, táýekelge barýǵa, al keıde birneshe kúndep kútýge týra keledi.

«Іssaparmen Aıyrtaý aýdanyndaǵy shaǵyn ǵana Sarysaı aýylyna jol tústi. Eldimeken tóbeniń eteginde tur eken. Aýyldy joǵarydan túsirmek bolyp, dóńniń ústine shyqpaq boldym. Kún salqyn, jel óńmenińnen ótedi, orta jolǵa jetkende jańbyr jaýyp ketti. Shylqyp sý boldym. Biraq ádemi kadrǵa qol jetkizý úshin qıyndyqqa qaramaı dóńge shyqtym. Joǵarydan alaqandaǵydaı kóringen aýyldy fotoǵa sátti túsirip, bar sharshaǵanym umyt boldy», - deıdi fototilshi.

Talǵat Tánibaevtiń fotoreportajy 2016 jyly Prezıdent ákimshiligi jýrnalıster arasynda uıymdastyrǵan saıysta úshinshi oryndy ıelengen eken.