Fotograf ızraıldik zymyrannyń Beırýttegi ǵımaratqa tıgen sátin túsirip aldy
ASTANA. KAZINFORM – Seısenbi kúni Izraıl áskerıleri Beırýt mańyndaǵy «Hezbolla» nysandary» ornalasqan ǵımaratqa soqqy berdi. Soqqydan bir saǵat buryn ǵımarat janynda «Hezbolla» uıymynyń baspasóz máslıhaty ótip, onda lıvandyq top ókili tilshilerge ótken demalys kúnderi ushqyshsyz basqarylatyn ushaqtar shabýyly týraly aqparat berdi, dep habarlaıdy Kazinform tilshisi.
Áýe shabýyly Izraıldiń osy aýdandaǵy eki ǵımaratty evakýatsııalaý týraly eskertýinen 40 mınýt ótken soń jasaldy.
Izraıldiń áskerı ókili nysanaǵa osy ǵımarattardyń nege alynǵanyn túsindirmedi, tek olardyń «Hezbollamen» baılanysty «múddeleri men nysandaryna» jaqyn ekenin aıtty.
Jaqyn jerde ótip jatqan «Hezbolla» baspasóz konferentsııasy úzilip, Associated Press fotografy ǵımaratqa qaraı ushyp bara jatqan zymyrannyń sýretin túsirip alǵan. Ǵımarat birneshe mınýttan soń joıyldy.
Eskertý kóptegen adamdardy osy aýdannan ketýge ıtermeledi, biraq basqalary, sonyń ishinde birneshe tilshi jaǵdaıdy baqylaýdy jalǵastyrdy. Shabýyl kezinde ǵımarat evakýatsııalanǵan, zardap shekkender týraly aqparat túsken joq.
Zymyran ǵımaratqa tıgenge deıin birneshe mınýt buryn shatyrǵa Izraıl áskeri eskertý soqqylary dep ataıtyn eki kishirek snarıad atyldy, dep habarlady oqıǵa ornyndaǵy AP tilshileri. Bul – Izraıldiń Gaza sektoryna soqqy berý kezinde ustanǵan tájirıbe.
«Men ǵımaratqa ushyp bara jatqan zymyrannyń ysqyryǵyn estidim, sodan keıin túsire bastadym», - dedi seısenbide fotograf Bılal Hýseın.
Dúısenbi kúni keshke Beırýtte ızraıldik áýe shabýyly eldiń eń úlken memlekettik aýrýhanasynyń qarsy jaǵyndaǵy birneshe ǵımaratty qıratyp, saldarynan 18 adam qaza tapty, keminde 60-qa jýyq adam jaraqat aldy. Izraıl áskeri «Hezbolla» nysanasyna soqqy bergenin, aýrýhananyń ózin nysanaǵa almaǵanyn málimdedi.
Lıvannyń densaýlyq saqtaý mınıstrligi seısenbide málimdegenindeı, sońǵy 24 saǵatta 63 adamnyń qaıtys boldy, saldarynan Izraıl men «Hezbolla» arasyndaǵy qaqtyǵystyń ótken jyly qaza tapqandardyń jalpy sany 2,546 adamǵa jetken.
