Fotoaımaq, barys jáne hor: Almatyda referendým qalaı ótip jatyr
ALMATY. KAZINFORM — Almatylyqtar 653 referendým ýchaskesinde daýys berip jatyr.
Saıası naýqanǵa baılanysty Almatydaǵy barlyq ýchaskelerde erekshe ári zamanaýı fotoaımaqtar uıymdastyryldy. Qala turǵyndary azamattyq boryshyn oryndap qana qoımaı, arnaıy belgilengen orynda estelik sýretke túsip jatyr.
Fotoaımaqtar biryńǵaı vızýaldy stılde bezendirilgen. Munda bannerler, navıgatsııa elementteri men sımvolıkalyq keskindemeler ornalastyrylǵan.
Almaty barysy
Áleýmettik jelilerde tanymal jasandy ıntellekt keıipkeri — Ádilet atty barys referendým ýchaskeleriniń birine baryp, daýys berdi.
Keıipker kıimin kıgen jigit aldymen óz tańdaýyn jasap, keıin qala turǵyndaryn naýqanǵa qatysýǵa shaqyrdy. Joba avtorlarynyń aıtýynsha, barys keıipkeri aýdıtorııamen, ásirese áleýmettik jelilerdi belsendi paıdalanatyn jastarmen túsinikti ári dostyq formatta baılanys ornatý úshin jasalǵan. Onyń daýys berýi kórsetilgen rolık referendýmǵa arnalǵan aqparattyq beınerolıkter serııasynyń sońǵy bólimi boldy.
«Ájeler hory» án aıtyp, shashý shashyldy
Naýryzbaı aýdanyna qarasty «Shuǵyla» shaǵyn aýdanyndaǵy № 562 saılaý ýchaskesinde turǵyndardy ulttyq naqyshtaǵy kıim kıgen «Ájeler hory» qarsy aldy. Ánshi ájeler alǵashqy mınýttan-aq adamdarǵa merekelik kóńil-kúı syılap, halyq ánderin oryndady. Sonymen qatar ýchaskege kelgen azamattardyń aldynda shashý shashyp, aq tilekterin bildirdi.
Qýyrshaqtar qarsy aldy
Medeý aýdanynda ornalasqan № 361 saılaý ýchaskesinde balalar úshin shaǵyn qýyrshaq teatrynyń qoıylymy uıymdastyryldy.
Balalardyń súıikti keıipkerleri beınesindegi uzyn boıly qýyrshaqtar qonaqtardy jyly júzben qarsy alyp, olarmen estelikke sýretke tústi. Eresekter daýys berýge qatysyp jatqan kezde balalar túrli-tústi qýyrshaqtar men ertegi keıipkerleri qatysqan qyzyqty kórinisti tamashalaı aldy.
Uıymdastyrýshylardyń aıtýynsha, mundaı sharalar saılaý ýchaskesinde merekelik atmosfera qalyptastyryp, balamen kelgen ata-analar úshin daýys berý protsessin áldeqaıda qolaıly etedi.
Eske salaıyq, buǵan deıin Nazym Qyzaıbaı referendýmda azamattyq ustanymyn bildirdi. Ol Almatydaǵy № 168 referendým ýchaskesine kelip, óz tańdaýyn jasady.
