Fosfor tyńaıtqyshy óndirisine 1 mlrd dollar ınvestıtsııa tartamyz – Erbol Qarashókeev

ASTANA. KAZINFORM – 2030 jylǵa qaraı Jambyl oblysynda premıým markaly fosfor tyńaıtqyshtaryn jylyna 1 mln tonnaǵa deıin óndirýdi josparlap otyr. Bul týraly oblys ákimi Erbol Qarashókeev málim etti.

- Oblys ekonomıkasynyń 19% úlesi ónerkásip óndirisine tıesili, onyń ishinde óńdeý ónerkásibi sektorynyń úlesi – 65,4%. Jyl basynan beri 727,8 mlrd teńgege ónerkásip ónimi óndirildi. Óńdeý ónerkásibi boıynsha negizgi ósimdi hımııa jáne qurylys ındýstrııasy qamtyp otyr. Elimizdiń jalpy hımııa salasy óniminiń shamamen 24%-y bizdiń oblysta óndiriledi. Hımııa kásiporyndary respýblıka boıynsha 100% fosfor, 81% mıneraldy tyńaıtqyshtar shyǵarady. Oblysta 13 mlrd tonna qory bar 48 fosforıt ken orny shoǵyrlanǵan, - dedi Erbol Qarashókeev oblystyń áleýmettik-ekonomıkalyq damýy týraly esep berý barysynda.

Óńir ákiminiń aıtýynsha, jyl basynan beri salada 212 mlrd teńgege hımııa ónimi shyǵarylyp, eksport kólemi 77%-ǵa jetti.

- 2030 jylǵa qaraı tyńaıtqyshtardyń premıým markalary (sýda erıtin fosfor tyńaıtqyshtary) men qundylyǵy joǵary ónimderdi jylyna 1 mln tonnaǵa deıin óndirýdi josparlap otyrmyz. Bul jobalar aıasynda óńirge 1 mlrd AQSh dollary kóleminde ınvestıtsııa tartylady, - dep túıindedi oblys basshysy.

Buǵan deıin Jambyl oblysynyń ákiminen Merki qant zaýytyna qyzylshasyn ótkize almaı uzyn-sonar kezekke turǵan fermerlerdiń máselesi týraly suraǵan edik. 

Sondaı-aq brıfıng barysynda Taraz qalasynyń eki ákimshilik aýdanǵa bólinetini belgili boldy. 

Aıta keteıik, keler jyldan bastap Jambyl oblysynda qaterli isikti jasandy ıntellektiniń kómegimen anyqtaıdy.