Forvardtyq sharttar jasaý múmkindigi úshin aýyl sharýashylyǵy ónimderiniń tizimi keńeıtildi

QYZYLORDA. QazAqparat – Forvardtyq sharttar jasaý múmkindigi úshin aýyl sharýashylyǵy ónimderiniń tizimi keńeıtildi. Bul týraly Qyzylorda oblysynda Premer-Mınıstrdiń orynbasary - Saýda jáne ıntegratsııa mınıstri Serik Jumanǵarınniń tóraǵalyǵymen ótken áleýmettik mańyzy bar azyq-túlik ónimderiniń baǵasyn turaqtandyrý boıynsha respýblıkalyq keńeste aıtyldy. Bul týraly QazAqparat Aýyl sharýashylyǵy mınıstrligi saıtyna silteme jasap habarlaıdy.

Talqylaýǵa múddeli ortalyq, oblystyq memlekettik organdar men bıznes-qoǵamdastyqtyń ókilderi qatysty. Aýyl sharýashylyǵy vıtse-mınıstri Erbol Tasjúrekov forvardtyq satyp alýdyń jańa tetikteri týraly baıandady. Atap aıtqanda, forvardtyq sharttar jasaý múmkindigi úshin aýyl sharýashylyǵy ónimderiniń tizimin keńeıtý týraly sóz boldy. Tizim qaraqumyq jarmasy, kúrish, kúnbaǵys maıy, un jáne qantpen tolyqtyryldy.

Vıtse-mınıstr kúrish, qaraqumyq jarmasy jáne kúnbaǵys maıy boıynsha kúzgi egin shıkizatyn satyp alý úshin óńdeý kásiporyndaryn forvardtyq qarjylandyrýdy júzege asyrý usynylatynyn túsindirdi. Osy maqsatqa ÁKK qarajaty baǵyttalýy múmkin.

«Bul baǵdarlamaǵa saýda jelileriniń ornyna kóbirek óndirýshilerdi tartý jáne deldaldardy alyp tastaý úshin úlgilik qaǵıdalarda aýyl sharýashylyǵy taýaryn óndirýshiler men qaıta óńdeý kásiporyndaryn qarjylandyrýdyń 70% baǵyty boıynsha talaptar belgilengen.

Osylaısha, aǵymdaǵy memlekettik qoldaý sharalarymen qatar forvardtyq satyp alý tetigi fermerlerge bolashaqta jeńildetilgen qarjylandyrýǵa qol jetkizýge jáne óz ónimderin kepildikpen satýǵa múmkindik beredi.

Jalpy, AÓK-ti memlekettik qoldaý kólemi jyl saıyn artyp keledi. Bıyl salany sýbsıdııalaýǵa 400 mlrd teńgeden astam qarajat jumsaldy. Sonymen qatar, memleket birqatar taýar toptaryn óndirýge ketetin shyǵyndardy arzandatady», - dep atap ótti Erbol Tasjúrekov.

Aıta keteıik, vıtse-premer Qyzylorda oblysyna sapary aıasynda óńirdiń agrosektor nysandaryn aralady. Delegatsııa kúrish óndiretin kásiporyndar, naýbaıhanalar men sý sharýashylyǵy nysandaryna bardy.