Forvardtyq mámileni ózgertý kerek – depýtat

ASTANA. KAZINFORM – Májilis depýtaty Anas Baqqojaev «Azyq-túlik kelisimshart korporatsııasy» UK» AQ men sharýalar arasyndaǵy forvardtyq satyp alý kelisimshartyn qaıta qaraýdy usyndy. Aıtýynsha, kelisimniń qazirgi nusqasy naryq talabyna jaýap bere almaı otyr.

– Jyl saıyn «Azyq-túlik kelisimshart korporatsııasy» kóktemgi dala jumysy kezeńiniń aldynda sharýalarmen kelisimshart jasaıdy. Bul jaqsy tetik ekeni daýsyz, alaıda qazirgi shartty reformalaý kerek sekildi. 

Birneshe sebepti tarqataıyq. Birinshiden, sharýalarǵa kelisimshart usynylatyn kezde baǵa óte tómen kórsetiledi. Ekinshiden, atalǵan shart boıynsha sharýa qambaǵa astyq jınaǵan kezde astyqtyń qyzyǵyn kóre almaıdy. Óıtkeni kúzde jappaı astyq jınaý barysynda baǵa tómen bolady, al qysta baǵa ósedi. Forvardtyq satyp alý kelisimshartyn jasaǵan sharýa qystaǵy kóterilgen baǵany kórip, kompanııaǵa ótkizgenine ókinip jatady, – deıdi Anas Baqqojaev.

Depýtattyń aıtýynsha, osy mazmundas másele AQSh-ta 90-jyldardyń basynda oryn alǵan. Olar muny sheshýdiń jolyn taýypty. AQSh-ta forvardtyq kelisimshart jasalady, avans beriledi. Al kúzde astyq jınalǵan sátte ónimdi satý quqy sharýalarǵa júkteledi eken. Anas Baqqojaev Úkimetke osy modeldi qarastyrýdy usynýda.

Buǵan deıin álemdik astyq eksportynyń otandyq naryqqa qalaı áser etetinin taldaǵan edik.