Forte Challenger týrnırindegi qazaqstandyq tennısshilerdiń qarsylastary anyqtaldy
NUR-SULTAN. QazAqparat – Elordada ótetin Forte Challenger 125 týrnırinde qazaqstandyq tennısshilerdiń qarsylastary anyqtaldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, jarystyń 3-raketkasy bolyp tirkelgen Mıhaıl Kýkýshkın alǵashqy aınalymda portýgalııalyq Frederıko Fereıra Sılvamen oınaıdy.
Dodanyń birinshi raketkasy, ońtústikkoreıalyq Sýn-Vý Kvon slovenııalyq Blaj Rolamen kezdesedi. Fınlıandııanyń úzdigi Emıl Rýýsývýorı tájirıbeli serbııalyq Vıktor Troıtskımen sheberlik baıqasady.
Týrnırge arnaıy shaqyrtý alǵan qazaqstandyqtardyń qarsylastary da belgili boldy. Denıs Evseev japonııalyq Tatsýma Itonyń shamasyn baıqap kóredi. Qos qazaqstandyq Tımofeı Skatov pen Dmıtrıı Popkonyń qaı jeńgeni kelesi kezeńge ótedi. Aleksandr Nedovesov irikteý saıysy jeńimpazdarynyń birimen kortqa shyǵady.
Juptyq synda A.Nedovesov V.Troıtskımen birge frantsııalyqtar Ýgo Grene – Aleksandr Mıýller, D.Evseev –ózbekstandyq Denıs Istomınmen jarystyń 1-raketkalary bolyp tirkelgen amerıkalyqtar Djekson Ýızroý – Natanıel Lemmonspen kezdesedi. Sondaı-aq T.Skatov – fın Otto Vırtanen jáne reseılikter Evgenıı Donskoı – Bogdan Bobrov, D.Popko – grýzııalyq Aleksandr Metrevelı jáne japonııalyq T.Ito – ulybrıtanııalyq Raıan Penıston, taǵy bir qazaqstandyq Grıgorıı Lomakın – ýkraınalyq Vladıslav Manafov jáne úndistandyq Baladjı Nsrıama – slovenııalyq B.Rola juptary ózara synǵa túsedi.
Bul – elordada qatarynan ótip jatqan ekinshi jarys. Forte Challenger 100 týrnıri jeksenbi kúni márege jetedi. Munda jekeleı synda fınalda amerıkalyq Makkenzı Makdonald pen aýstralııalyq ıÝrıı Rodıonov bas júldeni sarapqa salady. M.Makdonald birinshi kezdesýinde qazaqstandyq M.Kýkýshkındi súrindirgen bolatyn.
Eske sala keteıik, budan buryn Aleksandr Nedovesovtiń juptyq synda Nur-Sultan jarysynyń jeńimpazy atanǵanyn, Aleksandr Býblıktiń Sıngapýr týrnıriniń fınalyna shyqqanyn jazǵan bolatynbyz.
