Fort-Shevchenko qalasynda ótken ǵasyrdan beri alǵash ret kınoteatr ashyldy

FORT-ShEVChENKO. QazAqparat - Túpqaraǵan aýdanynyń ortalyǵy Fort-Shevchenko qalasynda kınoındýstrııa salasynyń órisin keńeıtý maqsatynda uzaq jyldarǵa sozylǵan úzilisten keıin zamanaýı kınoteatr ashyldy, dep habarlaıdy QazAqparat.

Oblystyq qoǵamdyq kommýnıkatsııa ortalyǵynyń málimetinshe, kınoteatrdy ashqan kásipker 10 adamdy turaqty jumyspen qamtymaq.

Kınoteatr zalynda bir mezette 200-ge jýyq adam kıno kóre alady.

Saltanatty sharaǵa Fort-Shevchenko qalasynyń turǵyndary, ardagerler men jastar qatysty.

Jıynda aýdan ákimi Rahat Eltızarov halyqqa mádenı rýhanı demalys syılaýǵa qyzmet etetin nysannyń ashylýymen quttyqtap, kınoteatr jumysyna sáttilik tiledi.

Jańa kınoteatr lentasyn Túpqaraǵan aýdanynyń qurmetti azamaty Amanǵalı Kúzembaev pen kıno salasynyń ardageri Fabııan Joldybaeva kesti.

Kınoteatr ǵımaratynda kıno zalynan bólek turǵyndar úshin barlyq jaǵdaı jasalǵan. Tamaqtanatyn oryn men kútý zaly da qarastyrylǵan.

Kınoteatrdyń ashylý saltanatynda bıyl jaryq kórgen «1941 jyldyń jazy» fılmi tegin kórsetilip, kınoteatr qonaqtaryna sýsyn taratyldy.

Aıta ketsek, Fort-Shevchenko qalasynda 1954 jyly «Zarıa Manglıshlaka» atty kınoteatr bolǵan. Biraq onyń qashan jabylyp qalǵany belgisiz.