Formýlalary bar dápter, kolbalar: Elordada esirtki daıyndaıtyn zerthana anyqtaldy
Qalalyq Polıtsııa departamentiniń málimetine sáıkes, esirtki óndirisin Ekibastuz qalasynyń turǵyny uıymdastyrǵan.
«Kúdikti jalǵa alǵan turǵyn jaıdy tintý kezinde sıntetıkalyq esirtki óndirý úshin paıdalanylatyn hımııalyq zattar, psıhotroptyq zattar salynǵan kolbalar, hımııalyq formýlalar jazylǵan dápterler, ólsheý tarazylary men gazqaǵarlar, sondaı-aq esirtki daıyndaý kezinde qoldanǵan jeke hımııalyq qorǵaý kostıými tárkilendi», - dep habarlady polıtsııadan.
Sondaı-aq, jedel qyzmetkerler satýǵa daıyndalyp qoıǵan bir dozalyq 1500-den astam esirtkini tapty.
«Mamandar hımııalyq reaktsııalardyń erekshelikterine baılanysty sıntetıkalyq esirtkini daıyndaý kezinde olardyń ózdiginen janýy nemese jarylyp ketý qaýpi bolǵan. Bólinetin kúıdirgish gaz adamnyń densaýlyǵyna orny tolmas zııan keltirýi múmkin. Sondyqtan zerthanany joıýdy ІІM Tótenshe jaǵdaılar komıtetiniń qyzmetkerleri hımııalyq qorǵaý kıimderimen júzege asyrdy», - delingen aqparatta.
Atap ótilgendeı, ustalǵan azamat ótkir ıistiń shyǵýyn turǵyn úıdiń ıesine «kólikke arnalǵan boıaý shyǵaramyn» dep túsindirgen.
Kúdikti óz «taýaryn» mol partııalarmen qalanyń ár jerine tyǵyp qaldyrý ádisimen ınternet arqyly satqan.
«Máselen, tergeý áreketterin júrgizý barysynda qalalyq zırattan 315 gramm esirtki zaty tárkilendi. Qazirgi ýaqytta ustalǵan azamat qamaýǵa alyndy. QR Qylmystyq kodeksiniń 297-babynyń 3-bóligi («Esirtki zattardy, psıhotroptyq zattardy jáne sol tektesterdi ótkizý maqsatynda zańsyz daıyndaý, óńdeý, ıemdenip alý, saqtaý, tasymaldaý, jóneltý nemese satý») boıynsha sotqa deıingi tergeý júrgizilýde. Bul bapqa sáıkes múlki tárkilenip, on jyldan on bes jylǵa deıingi merzimge bas bostandyǵynan aıyrylýy múmkin. Qylmysqa qatysy barlardy anyqtaý jáne ustaý boıynsha jedel-izdestirý sharalary júrgizilýde», - dedi Polıtsııa departamentinen.