Formýla jarystarynda Qazaqstan namysyn 17 jastaǵy qyz qorǵaıdy
ASTANA. QazAqparat - Elimizdiń jas avtoshabandozy, kartıngten Qazaqstannyń birneshe dúrkin jeńimpazy Lıýbov Andreeva Formula Russia jarysyna qatysady, dep habarlaıdy jarystyń resmı saıty.
17 jasar jas qyz ótken jyldyń sońynda shaqyrtý alǵan bolatyn, búginderi ol 2014 jyldyń kóp kezeńdi jarys qatysýshylarynyń qataryna engizildi.
Formula Russia onyń mansabyna úlken serpilis berýi múmkin. Eger ózin jaqsy kórsetkishtermen kórsetip jatsa, keıin F2, GP2, Formula Renault 3.5 jarystaryna shyǵa alady. Olar óz kezeginde eń bedeldi doda - Formýla-1 jarystaryna joldama bermek.
«Lıýbov Andreevanyń oǵan barlyq múmkindikteri bar, ol jastaıynan kartıngpen aınalysady, ózi jas, eń bastysy bul bastamasyn januıasy qoldap otyr», - dep jazady saıt.
Búgingi tańda Lıýbov sáýirde ótetin synaq jarystaryna daıyndalýda. Gran-Prıdiń alǵashqy aınalymy Tatarstanda KazanRing avtodromynda 10-11 mamyr kúnderi ótedi.
Qazir reseılik formýlaǵa qatysý úshin L.Andreeva demeýshi izdep jatyr.
