«Formýla-1» jarysyn kórý úshin nemis jigiti Monakoǵa úsh apta boıy júgirip bardy
ASTANA. KAZINFORM – 26 jastaǵy qasapshy Krıstofer Shreder Monakoda ótetin «Formýla-1» jarysyn kórý úshin 22 kúnde 1010 shaqyrym qashyqtyqty júgirip ótti, dep jazady Bild basylymy.
Ol Nıderlandymen shekaradaǵy Germanııanyń Doveren aýylynda turady. Sol jerden Lıýksembýrgke, keıin Dıjon, Lıon, Avınon, Kann, Nıtstsa qalalary arqyly Monakoǵa deıin jetken.
Sapar barysynda Krıstofer kúnine 7-8 lıtr sý iship, úsh banan men birneshe energetıkalyq tiske basar jep otyrǵan. Tolyqqandy tamaqty tek keshke, uıyqtaýǵa toqtaǵan kezde ǵana jegen.
– Men denem qaljyraǵan naǵyz «tozaqty» bastan ótkerdim. Janymda kólikpen birge júrgen bólem ıAn bolmasa, muny eńsere almas edim. Alǵashqy úsh kún erekshe aýyr ótti. Bıiktik aıyrmasy 1500 metrge jetti, men muny jetkilikti eskermeppin. Tórtinshi kúni berilgim keldi. Tánim «joq» dese, jandúnıem «ıá» dedi, – deıdi Krıstofer.
Mundaı júgirý ıdeıasy onyń oıyna ótken jyldyń qańtarynda kelgen. Alaıda daıyndyqty tek bir jyldan keıin bastaǵan.
Tórt aılyq jattyǵý kezinde ol 1200 shaqyrym júgirip ótken. Qazir Krıstofer munyń jetkiliksiz bolǵanyn moıyndap otyr.
Monakoǵa deıingi jolda ol 8 keli salmaq tastap, kúnine shamamen 5000 kalorııa jumsaǵan.
– Júgirýdiń 13-táýliginde aýa temperatýrasy 36 gradýsqa jetkende denemnen kún ótip ketti. Soǵan qaramastan kelesi kúni qaıta júgirdim. Kelesi 33 shaqyrymnan keıin toqtaýǵa májbúr bolyp, taǵy 5 shaqyrymdy jaıaý júrip óttim. Sodan keıin baryp josparlanbaǵan bir kún ǵana tolyq tynyqtym, – dedi ol.
Aıta keteıik, buǵan deıin 76 jastaǵy ulytaýlyq saıahatshynyń álemdi jaıaý aralaǵanyn jazdyq. Jıhankez Serbııa, Majarstan, Aýstrııa, Germanııa jáne Frantsııa elderin jaıaý júrip ótip, sáýir aıynda ǵana elge oraldy.
