«Formýla-1» úsh dúrkin chempıony kóz jumdy
NUR-SULTAN. QazAqparat - Burynǵy «Formýla-1» chempıony ári bıznesmen Nıkı Laýda 70 jasynda ómirden ozdy. Bul týraly Aýstrııanyń ORF telearnasy Laýda otbasynyń elektrondy hatyna silteme jasap habarlady.
«Bizdiń súıikti Nıkı 2019 jylǵy 20 mamyr, dúısenbi kúni ómirden ozǵanyn qabyrǵamyz qaıysa málimdeımiz», - delingen hatta.
Laýda úsh dúrkin «Formýla-1» chempıony bolǵan, 1976 jyly Germanııadaǵy Nıýrbýrgrıng kúre jolynda jan túrshigerlik apatqa ushyrap, aýyr jaraqattar alǵan bolatyn. 90-jyldary burynǵy apat saldarynan búırek aýrýlaryna shaldyqqan. Sonda oǵan áıeli Bırgıt Vettsınger donor bolǵan edi. Al 2018 jyldyń jazynda ókpesi almastyrylǵan.
Sońǵy jyldary Laýda bıznespen aınalysty. Ári, 2012 jyldyń qyrkúıeginen bastap «Mersedes» komandasynyń baqylaý keńesiniń tóraǵasy boldy.
