«Formýla 1» maýsymy Aýstrııada 5 shildede bastalady
NUR-SULTAN. QazAqparat - Halyqaralyq avtomobıl federatsııasy (FIA) «Formýla 1» avtomobılder klasyndaǵy jarystar boıynsha álem chempıonaty maýsymnyń 5 shildede bastalýyn maquldady. Bul týraly The Judge 13 portaly habarlaıdy.
Derekkóz aqparaty boıynsha «Formýla 1» basshylyǵy juma kúni FIA-dan tıisti habarlama alǵan. Aýstrııa qatarynan eki kezeńdi qabyldaıdy degen boljam bar. Jarystyń birinshi kezeńi 5 shildede, al ekinshisi - 8 nemese 9 shildede ótýi múmkin. Іzinshe eki kezeń Ulybrıtanııada (19 jáne 23 shildedegi jarystar) ótedi. Báseke - kórermendersiz, avtodromǵa translıatsııany qamtamasyz etetin televızııalyq brıgadalar ǵana jiberiledi.
«Árbir komanda jeke otelde ornalastyrylatyn bolady. Komandalarǵa ádettegideı shekteýler qoıylady», deıdi «Formýla 1» komandalarynyń birine jumys jasaıtyn The Judge 13 derekkózi.
Koronavırýs pandemııasyna baılanysty «Formýla 1» kúntizbesi aıtarlyqtaı ózgeristerge ushyrady.
Budan buryn Aýstralııadaǵy, Monako jáne Frantsııadaǵy Gran-prı ótkizilgen joq, sondaı-aq Bahreındegi, Vetnamdaǵy, Kanadadaǵy, Qytaıdaǵy, Nıderlandydaǵy, Ispanııadaǵy, Ázerbaıjandaǵy kezeńder belgisiz merzimge shegerildi.
Reseılik kezeń 25-27 qyrkúıekke josparlanyp otyr.
