«Formýla-1» Bahreın men Saýd Arabııasyndaǵy Gran-prı jarystaryn ótkizbeıtin boldy
ASTANA. KAZINFORM – Sáýir aıyna josparlanǵan «Formýla-1» chempıonatynyń Bahreın men Saýd Arabııasyndaǵy kezeńderi Taıaý Shyǵystaǵy shıelenisti jaǵdaıǵa baılanysty ótkizilmeıtin boldy, dep habarlady Formula1.com.
Chempıonat uıymdastyrýshylarynyń málimetine súıensek, jaǵdaıdy baǵalaǵannan keıin Bahreın men Jıdda qalalarynda josparlanǵan jarystardy buǵan deıin belgilengen merzimde ótkizbeý týraly sheshim qabyldanǵan. Túrli nusqalar qarastyrylǵanymen, sáýir aıynda ótpeı qalǵan jarystardyń ornyna basqa kezeńder qosylmaıdy.
Sondaı-aq osy ýaqytqa josparlanǵan jastar serııalarynyń jarystary — Formula 2, Formula 3 jáne F1 Academy kezeńderi de ótkizilmeıdi.
Sheshim Halyqaralyq avtomobıl federatsııasymen jáne jarys kezeńderin uıymdastyrýshylarmen kelisim boıynsha qabyldanǵan.
«Formýla-1» uıymynyń prezıdenti ári bas atqarýshy dırektory Stefano Domenıkalı bul sheshimniń ońaı qabyldanbaǵanyn, alaıda qazirgi jaǵdaıda jalǵyz múmkin qadam bolǵanyn aıtty. Ol Halyqaralyq avtomobıl federatsııasyna jáne jergilikti seriktesterge túsinistik tanytqany úshin alǵys bildirip, jaǵdaı turaqtalǵannan keıin jarystardyń kúntizbege qaıta engiziletinine úmit artty.
Eske sala ketsek, buǵan deıin BYD-diń Formýla 1-ge qatysýy shyǵyndar men kelissózderge baılanysty keshigýi múmkin ekenin jazdyq.
