«Formýla-1» Bahreın Gran-prıin Malaızııada ótkizedi
ASTANA. KAZINFORM — Taıaý Shyǵystaǵy ahýalǵa baılanysty sáýir aıyna josparlanǵan Bahreın men Saýd Arabııasynyń Gran-prıi keıinge shegerilgennen keıin Bahreın kezeńi 2-4 qazan aralyǵynda Malaızııada ótetin boldy.
Jarys 2017 jyldan beri «Formýla-1» kezeńderin qabyldamaǵan Malaızııadaǵy Sepang halyqaralyq trassasynda uıymdastyrylady.
«Formýla-1» resmı saıtynda «Sepang» trassasy chempıonat kúntizbesindegi eń tanymal jáne qıyn trassalardyń biri ekeni aıtylǵan. Áserli jarystar men qubylmaly aýa raıy ony qaıta josparlanǵan kezeń úshin tamasha orynǵa aınaldyryp otyr.
— Bul – jankúıerlerimiz úshin tamasha jańalyq. Olar «Formýla-1» kúntizbesiniń qyzyq ári mazmundy jalǵasyn tamashalap qana qoımaı, sporttyń áıgili trassalardyń birine oralǵanyna kýá bolady. Malaızııa – keremet el, al Sepang «Formýla-1» tarıhynda erekshe oryn alady, – dedi «Formýla-1»-diń prezıdenti jáne bas atqarýshy dırektory Stefano Domenıkalı.
Malaızııa keıingi ret «Formýla-1» kezeńin 2017 jyly qabyldaǵan. Qazir bul trassada MotoGP álem chempıonatynyń jarystary ótip jatyr. Bahreın Gran-prıi 26 qyrkúıekte ótetin Ázerbaıjan jáne 11 qazandaǵy Sıngapýr Gran-prıiniń aralyǵyna josparlanǵan.
Tarıhta bir eldiń atynan Gran-prı jarysyn basqa eldiń qabyldaǵan birneshe mysaly bar. Atap aıtqanda, Lıýksembýrg Gran-prıi Germanııanyń Nıýrbýrgrıng trassasynda, San-Marıno Gran-prıi uzaq jyl boıy Imolada, al Shveıtsarııa Gran-prıi Frantsııa aýmaǵynda uıymdastyrylǵan.
Eske salaıyq, «Formýla-1» naýryz aıynda Bahreın men Saýd Arabııasyndaǵy Gran-prı jarystaryn ótkizbeıtinin habarlaǵan edik.
