Formýla-1: Ázerbaıjanda jarys kezeńine vızalyq rejım jeńildetiledi
BAKÝ. QazAqparat – Ázerbaıjan prezıdenti Ilham Álıev búgin maýsym aıynda «Formýla-1» Gran-prıiniń ótýine baılanysty elge keletin sheteldikter men azamattyǵy joq adamdar úshin vızalyq rásimderdi jeńildetý týraly ókimge qol qoıdy, dep habarlaıdy QazAqparattyń menshikti tilshisi.
Qujatqa sáıkes, «Formýla-1» jarysyna qatysýǵa kelgen sheteldikter 2021 jylǵy 1 mamyrdan 15 maýsymǵa deıin eldiń halyqaralyq áýejaılarynda vıza ala alady. Bul rette olar tómendegi qujattardyń birin usynýy kerek:
- Jarys uıymdastyrýshylarynyń – Formula One Management Limited kompanııasynyń jáne halyqaralyq avtomobıl federatsııasynyń akkredıtteý kartasy;
- «Baku City Circuit» («Baký qalalyq aınalymy») operatsııalyq kompanııasy bergen akkredıtteý kartasy.
Osyǵan baılanysty Ázerbaıjan Syrtqy ister mınıstrligine tıisti organdardy, halyqaralyq jarys uıymdastyrýshylaryn vızalyq rásimderdi jeńildetý týraly habardar etý jáne osy aqparatty mınıstrliktiń ınternet-resýrstary men Ázirbaıjannyń sheteldik ókildikterinde ornalastyrýdy qamtamasyz etý tapsyryldy.
Uıymdastyrýshylardyń aıtýynsha, «Formýla-1» jarysynyń «Ázerbaıjan Gran-prıi» 2021 jyly jańa jaǵdaı boıynsha – kórermendersiz ótedi jáne jýrnalıster sany shekteýli bolady. Jarys 6 maýsymda Baký qalasynyń kóshelerinen júrip ótedi.
Esterińizge sala keteıik, Formýla-1 Álem chempıonatynyń bul maýsymy kezeńderdiń rekordtyq sanyn qamtıdy (23), sonymen qatar avtojarys álemine birinshi ret «koroldik jarystar» áleminiń segiz dúrkin chempıonyn syılaı alady./
