Formýla-1: Ázerbaıjan Gran-prıinde alǵashqy kúnniń úzdikteri anyqtaldy
ASTANA. KAZINFORM — Bakýde Ázerbaıjan Gran-prıiniń alǵashqy jarys kúni aıaqtaldy. Mercedes komandasynyń júrgizýshisi Djordj Rassell eki erkin jattyǵýda da eń úzdik nátıje kórsetti. Ekinshi jattyǵýda onyń komandalasy Kımı Antonellı ekinshi, al Red Bull sapyndaǵy Maks Ferstappen úshinshi orynǵa jaıǵasty, dep habarlaıdy Kazinform agenttiginiń Ázerbaıjandaǵy menshikti tilshisi.
Alǵashqy erkin jattyǵýda Rassell aınalymdy 1 mınýt 45,387 sekýndta baǵyndyryp, Ferstappennen 0,400 sekýndqa ozyp ketti. Úshinshi nátıjeni Sharl Lekler kórsetse, tórtinshi orynǵa Lıýıs Hemılton jaıǵasty.
Ekinshi erkin jattyǵýda Rassell ýaqytyn 1 mınýt 43,347 sekýndqa deıin jaqsartty. Antonellı odan 0,552 sekýndqa, Ferstappen 0,827 sekýndqa qalyp qoıdy. Al Lekler tórtinshi, Hemılton besinshi orynǵa shyqty.
Antonellı úshin Bakýdegi alǵashqy kún sátsiz bastaldy. Birinshi erkin jattyǵýdyń 25-mınýtynda Mercedes júrgizýshisi jetinshi burylys tusynda gıdravlıkalyq júıedegi aqaýǵa baılanysty kóligin toqtatty. Sonyń saldarynan trassada Virtual Safety Car rejımi iske qosyldy. Alaıda ol ekinshi jattyǵýda qaıta jolǵa shyǵyp, ekinshi nátıjeni kórsetti.
Ekinshi erkin jattyǵýda taǵy bir oqıǵa tirkeldi. Racing Bulls júrgizýshisi Arvıd Lındblad segizinshi jáne toǵyzynshy burylystar arasyndaǵy tar bólikte kóligin ıgere almaı, qabyrǵaǵa soǵyldy. Osydan keıin jattyǵý qyzyl jalaýmen ýaqytsha toqtatyldy.
Tehnıkalyq máseleler ózge júrgizýshilerge de kedergi keltirdi. Haas sapyndaǵy Olıver Bearman qozǵaltqyshy toqtaǵan soń trassadaǵy jumysyn merziminen buryn aıaqtady. Al alǵashqy erkin jattyǵýda Williams júrgizýshisi Karlos Saıns pen Racing Bulls ókili Isak Hadjar tehnıkalyq aqaýǵa tap boldy. McLaren júrgizýshisi Lando Norrıs te kóligindegi máselege baılanysty jattyǵýdyń edáýir bóligin ótkizip aldy.
Jarys bastalmaı turyp, Aston Martin júrgizýshileri Fernando Alonso men Lens Strolldyń kúshtik qondyrǵynyń keıbir bólshekteri boıynsha maýsymdyq lımıtten asqany anyqtaldy. Tehnıkalyq reglamentke sáıkes, ekeýi de starttyq torda aıyppul alady.
Bakýdiń qalalyq jarys joly 6,003 shaqyrymǵa sozylady. Segizinshi jáne toǵyzynshy burylystar tusynda trassa eni 7,6 metrge deıin tarylyp, júrgizýshiler úshin eń kúrdeli ýchaskelerdiń birine aınalady.
Gran-prı baǵdarlamasy 25 qyrkúıekte jalǵasady. Baký ýaqytymen saǵat 12:30–da úshinshi erkin jattyǵý, 16:00–de irikteý kezeńi ótedi. Al 26 qyrkúıek saǵat 15:00–de 51 aınalymǵa josparlanǵan negizgi jarys bastalady.
Buǵan deıin Bakýde «Formýla-1» boıynsha Ázerbaıjan Gran-prıiniń onynshy kezeńi bastalǵanyn habarlaǵan edik.
