Formaǵa qatysty buǵan deıingi syn-eskertpelerdi eskerdik – Dıas Ahmetshárip
ASTANA. KAZINFORM – Sanaýly kúnderden soń Ońtústik Koreıanyń Kanvon qalasynda IV qysqy jasóspirimder olımpıadasy bastalady. Búgin elordada sportshylardy shyǵaryp salý saltanatty sharasy ótti. Osy oraıda Týrızm jáne sport mınıstriniń keńesshisi Dıas Ahmetsháripti áńgimege tartqan bolatynbyz.
— Qysqy jasóspirimder olımpıadasynan qandaı úmit kútemiz? Sportshylardyń daıyndyǵy qandaı?
— Memleket basshysynyń tapsyrmasymen Azııa oıyndarynyń keıin barlyq sport túri boıynsha shtab quryldy. Onyń ishinde qysqy sport jáne Kanvon-2024 jasóspirimder olımpıadasyna arnalǵan shtab ta bar.
Ókinishke qaraı, buǵan deıin Lozannada ótken qysqy jasóspirimder olımpıadasynda júlde buıyrmady. Bul joly barlyq sportshy jeńiske daıyn. Atap aıtqanda, short-trek pen konkımen júgirý sportynan úmit zor. Jalpy komanda olımaıadaǵa laıyqty daıyndaldy. Sportshylarymyz júldesiz oralmaıdy dep oılaımyn. Shtab jumysy aıasynda sportshylar mınıstrmen jáne Qazaqstandaǵy Ońtústik Koreıanyń elshisimen kezdesti.
— Jasóspirimder el namysyn qorǵaýǵa, aıtýly halyqaralyq saıysqa bara jatqanyn sezinedi dep oılaısyz ba?
— Iá, bul — olardyń halyqaralyq deńgeıdegi olımpıadalyq oıyndarǵa alǵashqy qadamy. Sportshylardyń arasynda buǵan deıin shetelde ótken túrli jarystarǵa qatysyp júrgender de bar. Kanvon olımpıadasyna sportshylarymyz lıtsenzııalyq týrnırden ótti. Nátıjesinde qysqy sporttyń 5 túrinen 30 lıtsenzııa buıyrdy. Jyl basy jaqsy bastaldy. Alda Parıj jazǵy olımpıadasy bar.
— Sportshylarymyzdyń formasy týraly aıtyp berseńiz. Buǵan deıin syn bolǵany belgili, bul joly kıim sapaly ma?
— Sport formasy sapaly. Ótken Azııa oıyndaryndaǵy (Hýanchjoý) formaǵa qatysty máselelerdi eskerdik. Al Parıj jazǵy olımpıadasynda basqa forma bolady. Oǵan bólek baıqaý jarııalanady. Jalpy sporttyq forma halyqaralyq olımpıada komıtetiniń erejesine sáıkes bolýǵa tıis. Kanvon olımpıadasynyń formasy — otandyq ónim, óz tiginshilerimizdiń qolynan. Azııa oıyndaryndaǵy jaǵdaı qaıtalanbaýy tıis. Atalǵan jarysqa 540 sportshy bardy, onyń ishinde ekeýi forma boıynsha óz pikirin bildirdi. Al Kanvonǵa 42 jasóspirim sportshy bara jatyr. Olar formamen tolyq qamtyldy.
Aıta keteıik, búgin qazaqstandyq sportshylar Kanvon-2024 qysqy jasóspirimder olımpıadasyna attandy.
IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi. Qazaqstannyń sport delegatsııasy quramynda sporttyń bes túrinen 42 sportshy bar.
Aıta ketsek, jasóspirimder olımpıadasynda Qazaqstan týyn «Ulttar sherýi» kezinde Qazaqstan týyn konkımen júgirýden Petropavldan ulttyq quramanyń múshesi Krıstına Shýmekova men oraldyq short-trekshi Erasyl Shyńǵyshan alyp shyǵady.
Qazaqstan jasóspirimder arasyndaǵy qysqy olımpıada oıyndaryna 2012 jyldan beri qatysyp keledi.
Jalpy, elimiz úsh qysqy jasóspirimder olımpıada oıyndaryna qatysyp, eki kúmis jáne alty qola medal jeńip aldy.
