Ford tejegish júıesindegi aqaýǵa baılanysty 500 myńǵa jýyq kólikti keri qaıtarady

ASTANA. KAZINFORM — AQSh-tyń Jol qozǵalysy qaýipsizdigi jónindegi ulttyq basqarmasy (NABDD) beısenbi kúni Ford markaly 500 myńǵa jýyq avtokólikti tejeý júıesindegi suıyqtyqtyń aǵýyna baılanysty keri qaıtaryp jatqanyn málimdedi.

AZERTADJ habarlaýynsha, esepte tejeý júıesindegi shlangtyń jarylýy suıyqtyqtyń aǵýyna alyp kelýi múmkin ekeni aıtylǵan. Bul óz kezeginde tejeý jolynyń uzarýyna jáne jol-kólik oqıǵasy qaýpiniń artýyna sebep bolýy yqtımal.

Ford kompanııasy bul aqaýǵa baılanysty eshqandaı apat nemese jaraqat týraly habar túspegenin málimdedi, dep jazady Reuters agenttigi.

Keri qaıtarý 2015–2018 jyldary shyǵarylǵan Ford Edge jol talǵamaıtyn kólikterine jáne 2016–2018 jyldary shyǵarylǵan lıýks sanatyndaǵy Lincoln MKX modelderine qatysty. NABDD baǵalaýynsha, keri qaıtarylyp jatqan kólikterdiń shamamen 1%-ynda bul aqaý anyqtalǵan.

Sonymen qatar, agenttik deregi boıynsha, Ford kompanııasy artqy shamyndaǵy aqaýǵa baılanysty 213 myńnan astam kólikti, al qaýipsizdik jastyǵy iske qosylǵanda jarylý qaýpine baılanysty 100 900 kólikti keri qaıtaryp jatyr.

Budan buryn byltyr qarasha aıynda amerıkalyq Ford avtomobıl kompanııasy qaýipsizdik beldikterinen aqaý shyǵýyna baılanysty 112 600 kólikti keri qaıtaryp jatqany anyqtaldy.

Sondaı-aq amerıkalyq kólik óndirýshi 2027 jyldyń sońyna deıin Germanııada 2900 jumys ornyn qysqartýdy josparlap otyrǵanyn habarlady.