Ford Germanııadaǵy úsh myńǵa jýyq jumys ornyn qysqartady
ASTANA. KAZINFORM – Amerıkalyq kólik óndirýshi Ford 2027 jyldyń sońyna deıin Germanııada 2900 jumys ornyn qysqartýdy josparlap otyrǵanyn habarlady. Negizgi soqqy Kelndegi zaýyt enshisinde bolmaq, onda shamamen tórtten bir jumys oryny joıylady, dep habarlaıdy BILD.
Bul sheshim kompanııanyń jeńil avtomobılder segmentindegi úlken shyǵyndarǵa, elektromobılder shyǵarý úshin qymbat qaıta qurylymdaýǵa jáne qatań ekologııalyq standarttarǵa baılanysty qabyldanǵan. Jaǵdaıdy memlekettik sýbsıdııalar toqtatylǵannan keıin elektromobılderge suranystyń kúrt tómendeýi qıyndatyp otyr.
«Biz Ford-tyń Eýropadaǵy básekege qabilettiligin qamtamasyz etý úshin kúrdeli, biraq sheshýshi sharalar qabyldaýǵa májbúrmiz», - dedi kompanııanyń atqarýshy dırektory Markýs Vassenberg.
Ford elektromobılder shyǵarýdy bastaý úshin Kelndegi zaýytty jańǵyrtýǵa eki mıllıard eýroǵa jýyq ınvestıtsııa quıyp úlgerdi, biraq kompanııanyń úmiti aqtalmady – jańa úlgilerdiń satylymy josparlanǵannan tómen bolyp qalyp otyr.
Qarjy tapshylyǵy kompanııa basshylarynyń ketýine ákelip soqty: osylaısha, osy jazda Germanııadaǵy Ford kompanııasynyń basshysy Martın Sander Volkswagen-ge aýysty.
Buǵan deıin Volkswagen Germanııadaǵy zaýyttaryn jabýdy qarastyryp jatqanyn habarlaǵan bolatynbyz. Qazan aıynda jazǵanymyzdaı, Eýropa men Germanııadaǵy eń iri avtokólik óndirýshi Volkswagen kompanııasynyń kirisi 64%-ǵa tómendedi.
Eske salsaq, Kazinform-nyń menshikti tilshisi Volkswagen daǵdarysy týraly taldaý materıal jasaǵan bolatyn.