Ford 255 myńnan astam Focus kóligin keri qaıtarýǵa májbúr bolyp otyr
ASTANA. KAZINFORM – Amerıkalyq Ford Motor Company kompanııasy 2012–2018 jyldary shyǵarylǵan 255 404 dana Focus avtokóligin keri qaıtarý týraly aqparat jarııalady, dep habarlaıdy AP.
Buǵan kólik júrip kele jatqan kezinde qozǵaltqyshtyń kenetten óshýine ákelýi múmkin aqaý sebep bolǵan. Mundaı jaǵdaı jol-kólik oqıǵalarynyń qaýpin arttyrady.
Kompanııanyń málimetinshe, másele adsorberdi úrleý klapanynyń aqaýyna baılanysty. Onyń isten shyǵýy kóliktiń qozǵalyp kele jatyp toqtap qalýyna ákelýi múmkin.
Keri qaıtarý naýqanyna osyǵan uqsas aqaýǵa baılanysty buryn basqa servıstik baǵdarlama aıasynda jóndeýden ótken avtokólikter de engizildi. Ford ókilderiniń aıtýynsha, buryn qabyldanǵan sharalar táýekeldi tolyq joıý úshin jetkiliksiz bolǵan.
Máseleni sheshý úshin dılerlik ortalyqtar transmıssııanyń baǵdarlamalyq jasaqtamasyn tegin jańartady.
Kólik ıelerine habarlamalar 6 shildeden bastap jiberile bastaıdy. Osy kúnnen keıin olar óz kóliginiń keri qaıtarý naýqanyna qatysy bar-joǵyn VIN-kod arqyly AQSh-tyń Ulttyq jol qozǵalysy qaýipsizdigi basqarmasy saıtynan teksere alady.
Kompanııa sondaı-aq qosymsha aqparat alý úshin kólik ıeleri Ford-tyń qoldaý qyzmetine júgine alatynyn habarlady.
Buǵan deıin Ford artqy kórinis kamerasyndaǵy aqaýǵa baılanysty shamamen 1,7 mıllıon avtokóligin keri qaıtaratyny týraly jazdyq.
