Forbes tizimine engen 17 jastaǵy aspaz tabys qupııasyn ashty

– Aspazdyqqa qyzyǵýshylyǵyńyz qalaı bastaldy? Kásibı aspaz bolýǵa kim shabyt berdi?

– Men Almatyda týyp-óstim. Úsh aǵam bar, otbasyndaǵy kenjesimin. Aspazdyqqa 11 jasymda qyzyǵa bastadym. Maǵan túrkııalyq aspazdar Býrak Ózdemır men Nýsret Gókche shabyt berdi. Olardyń jumysyn Instagram jelisinen jıi baqylaımyn. «Ratatýı» mýltfılmi de qyzyǵýshylyǵymdy oıatty.

Alǵash daıyndaǵan taǵamym – qarapaıym jumyrtqa. Al túsirgen alǵashqy beınerolıgim «Napoleon» tortynyń retseptine arnaldy. Damýyma aǵam Dıas dem berdi.

– Tańdaýyńyzǵa áleýmettik kózqaras kedergi bolǵan joq pa? Qoǵamda as ázirleýdi áli de áıeldiń mindeti sanaıtyndar bar...

– Bul – eskirgen túsinik. Tamaq pisirý – ár adamǵa qajet daǵdy. Men úshin as ázirleý – shyǵarmashylyq, odan lázzat alamyn.

Qurdastarymnan, tipti menen kishi balalardan da jıi habarlama alamyn. Olar retseptterim boıynsha taǵam daıyndap kórgenin nemese meniń vıdeolarymnan keıin blog júrgizýge qyzyqqanyn jazady. Bul meni qýantady.

– Qazir erekshe taǵamdar men aýqymdy as ázirleýge basymdyq beresiz. Kontent baǵytyn ózgertýge ne sebep boldy?

– Aýdıtorııa ósken saıyn basqa fýd-blogerlerden erekshelenip, óz qoltańbamdy qalyptastyrǵym keldi. Sondyqtan erekshe taǵamdar ázirlep, olardy áserli usynýǵa tyrysamyn. Keıde óte úlken kólemde as daıyndaımyn. Mundaı vıdeolar kórermenderge qyzyq.

Sonymen qatar ata-anama arnap dastarqan jaıǵandy jaqsy kóremin. Jaqyndaryńa qamqor bolyp, olardy qýantý keregin kórsetkim keledi. Men úshin otbasylyq qundylyqtardy nasıhattaý  mańyzdy.

– Áleýmettik jelidegi tanymaldyqty kásibı aspazdyqpen qalaı ushtastyryp júrsiz? Bolashaqta shef-aspaz bolý úshin qandaı qadam jasamaqsyz?

– Bul – meniń úlken armanym. Jaqynda Narxoz ýnıversıtetine «Meıramhana isi jáne qonaqúı bıznesi» mamandyǵyna oqýǵa tústim. Meıramhana bıznesiniń ishki qurylymyn túsinip, osy salada sapaly bilim alǵym keledi.

Aldaǵy josparym – tájirıbeli restoratordyń qasynda júrip, odan tájirıbe jınaqtaý. Komandany qalaı basqaratynyn, sheshimderdi qalaı qabyldaıtynyn, qıyndyqtardy qalaı sheshetinin kórgim keledi. Naqty tájirıbe jınaý jeke jobamdy ashýǵa kómektesedi. Bolashaqta óz meıramhanamdy ashýdy josparlap otyrmyn.

– Qazaq ashanasyn sheteldik aýdıtorııaǵa tanystyrý múmkindigi bolsa, qandaı úsh taǵamdy tańdar edińiz?

– Birinshi kezekte besbarmaqty usynar edim. Ony úlken kólemde daıyndap, etti qaınatýdan bastap, tuzdyq ázirleý men qamyr jaıýǵa deıingi protsesti kórsetkim keledi.

Ekinshi taǵam – baýyrsaq. Ony úlpildek, qyzarǵan kúıinde pisirip, ystyqtaı úı qaımaǵymen usynar edim. Úshinshisi – qoı etinen jasalǵan sirne.

– YouTube arnańyz alǵashqy úsh jylda tabys ákelmegen. Soǵan qaramastan, jumysty jalǵastyrýǵa ne kúsh berdi?

– 11 jasymda monetızatsııa týraly oılaǵan joqpyn. Myńdaǵan adamnyń retseptim boıynsha taǵam daıyndap, jyly pikir jazǵany men úshin úlken qýanysh edi. Bul iske qyzyǵýshylyqpen, shyǵarmashylyq úshin kiristim.

Alǵashqy tabys túse bastaǵanda, blogtyń jaýapkershiligi de artty. Hobbıimniń bızneske aınalǵanyn túsindim. Aǵam ekeýimiz tapqan aqshany birden jobany damytýǵa jumsadyq. Páter satyp alyp, armanymyzdaǵy asúıdi jabdyqtadyq, jaryq pen ydys-aıaq aldyq. Sapaly kontent túsirý úshin azyq-túlikke de kóbirek qarajat bóle bastadyq. Osylaısha, tabys ıdeıalarymyzdy júzege asyrýǵa múmkindik berdi.

– Qazir arnańyzda 4 mıllıonnan astam jazylýshy, vıdeolaryńyzda 2,5 mıllıardtan astam qaralym bar. Qandaı vıdeolar aýdıtorııany kóbirek qyzyqtyrady?

– Kórermenderge shoý elementteri bar, erekshe taǵamdar ázirlenetin vıdeolar unaıdy. Mysaly, jilik maıynan taǵam daıyndaý, kóp mólsherde manty pisirý nemese qamyrdan jeýge bolatyn ydys jasap, oǵan daıyn asty salyp usyný kóp qaralym jınady.

Kórermenniń nazaryn taǵamnyń aýqymy men erekshe usynylýy arqyly aýdaramyn. Sonymen birge  jańa aspazdyq ádisterdi meńgerýge tyrysamyn.

– Blog júrgizýdi bastaý úshin alǵashqy telefonyńyzǵa aqsha jınap, traıfl, tort pen kapkeık satqan ekensiz. Bul tájirıbe sizge ne úıretti?

– Armanǵa jetý úshin eńbektený kerek ekenin úıretti. Túsirilimge telefon qajet bolǵanda, óz qolymmen desertter jasap satyp, alǵashqy iPhone telefonyma aqsha jınadym.

Sol kezde-aq maqsatqa jetý úshin ǵajaıypty kútpeı, áreket etý keregin túsindim. Qazir de osy ustanymdy basshylyqqa alamyn.

– Áleýmettik jeli arqyly tanylyp, tabys tapqysy keletin jastarǵa qandaı keńes berer edińiz?

– Birinshiden, qolda bar múmkindikten bastańyzdar. Qymbat kamerany nemese qolaıly sátti kútýdiń qajeti joq. Ekinshiden, óz erekshelikterińizdi tabyńyzdar. Fýd-blogerler kóp, sondyqtan kórermendi nemen tańǵaldyra alatynyńyzdy oılańyzdar. Úshinshiden, eńbekqor ári shydamdy bolyńyzdar. Taǵam ázirleý protsesin túsirý ońaı emes, sondyqtan nátıjege jetý úshin turaqty jumys qajet.

Eske salaıyq, Eńbek jáne halyqty áleýmettik qorǵaý mınıstrligi erekshe suranysqa ıe mamandyqtardyń tizimin usyndy. Onyń qatarynda aspaz kósh basynda tur.