Forbes tizimindegi jastar: qazaq tilin nasıhattap júrgen joba
ASTANA. KAZINFORM – Qazaq jastary áleýmettik jeli arqyly qazaq tarıhy men mádenıetin nasıhattap, qazaq tilin úıretip júr. Forbes-tiń «30 under 30» tizimine engen Dıas jáne Áıgerim Kamerıdanovtar Jibek Joly arnasynyń «Búgin LIVE» baǵdarlamasyna qonaq bolyp, jobalary týraly aıtyp berdi.
– Paraqshamyzdy 2018 jyly qyrkúıek aıynda ashtyq. Bastapqyda Telegram arnasynda anonımdi túrde, jaı hobbı retinde júrgizgen edik. Óıtkeni men bala kezimnen tarıhqa qyzyǵatyn edim. Men sııaqty jastarǵa da bul qyzyq dep oıladym. Solaı Áıgerim ekeýmiz bastadyq. Keıinnen Instagram-dy quryp, birtindep oqyrmandardy jınaı bastadyq. Sol arqyly osyndaı jobaǵa aınaldy. Basty maqsatymyz – qazaq tarıhyn, mádenıeti men dástúrin jastar arasynda nasıhattaý, ony zamanaýı tásilder arqyly taratý, – deıdi Unknownkazak jobasynyń avtory Dıas Kamerıdanov.
Búginde @unknownkazak ınstaparaqshasynda 180 myńǵa jýyq oqyrman bar.
– Barlyq áleýmettik jelidegi oqyrmanymyzdy qosqanda shamamen 250 myńdaı oqyrmanymyz bar. Ár jobanyń ózindik aýdıtorııasy bar. Komandamyzda onǵa jýyq maman jumys isteıdi. Biz aqparattarǵa jaýap beremiz jáne tehnıkalyq máselelerdi retteıtin adamdar bar, – deıdi stýdııa qonaǵy.
Áleýmettik jelide aqparat berýden bastalǵan jumys keıin UnknownKazak Talks alańyna aınalǵan.
– Bul ıdeıa kitap klýbyn qurýdan bastaldy. Bastapqyda anonımdi túrde áleýmettik jelilerge salyp júrgendikten, sońynda «offlaın formatta bir nárse isteý kerek» dep oıladyq. Bizdiń aýdıtorııamyz orystildi qazaqtar bolǵandyqtan, 2022 jyly «Qazaq tilin birge úıreneıik» degen kitap klýbyn ashtyq. Birinshi kezdesýge 100-ge tarta adam keldi. Solaı aı saıyn klýb múshelerimen jınalyp júrdik. Bir joly kezdesýge Zıra Naýryzbaıdy shaqyrdyq. Sol kezde adamdar kelip, suraqtaryn qoıyp, talqylaý bolyp ketti. Sodan keıin «Qazaq tilinde jańa alań ashsaq qaıtedi?» degen ıdeıa keldi. Ártúrli spıkerlerdi shaqyryp, jastarǵa paıdaly dúnıelerdi bólisse degen oımen ashyldy, – deıdi Dıastyń jary ári seriktesi Áıgerim Kamerıdanova.
Jobanyń maqsaty elordada táýelsiz jastarǵa arnalǵan alań qurý deıdi joba avtorlary.
– Bir-birimen tanysý, oı almasý, ártúrli taqyryptardy talqylaý, tájirıbemen bólisý úshin osy jobany bastadyq. Qazir bul jobanyń jumys istep jatqanyna 3 jyl boldy. Eń basty maqsat – qazirgi qazaq zııalylaryn qalyptastyryp, qazaq tilin tanymal etý. Bizdiń alańǵa aı saıyn shamamen 500–600 adamdaı jınalady. Talks týraly aıta ketsek, bul TEDx formatyndaǵy konferentsııa sekildi joba. Aı saıyn ótedi. Ázirge tek Almaty men Astanada turaqty túrde ótip jatyr. Aı saıyn tórtke jýyq spıkerdi tańdaımyz. Bizdiń basty talap – baıandamanyń qazaq tilinde bolýy jáne ol adam óz salasynyń eksperti bolýy shart, – deıdi Áıgerim.
Dıas pen Áıgerim soltústik baǵytta trıp uıymdastyryp, ońtústik óńirlerge de saparlar jasaǵan. Qazirgi ýaqytta AQSh-ta ýaqytsha turyp jatqandyqtan, Boston jáne Nıý-Iork qalalarynda tórt ret is-shara ótkizipti. Sonymen qatar Parıj qalasynda da kezdesýler uıymdastyrǵan.
Aıta keteıik, elimizde qazaq tilin oqytýdyń jańa tsıfrlyq formaty paıda boldy.
