Forbes tizimindegi kásipkerler Qostanaıda tasqynnan zardap shekkenderge baspana satyp áperedi
QOSTANAI. KAZINFORM — Qostanaı oblysyna iri bıznes ókilderi kómek kórsetýge daıyn: ADD Sapital holdınginiń negizin qalaýshy Danııar Ábilǵazın, ERG kompanııasynyń dırektorlar keńesiniń múshesi Shýhrat Ibragımov, «Allıýr» jáne «AgromashHoldıng» kompanııalarynyń dırektorlar keńesiniń tóraǵasy Andreı Lavrentev, sondaı-aq «RG Brands» basqarma tóraǵasy Tımýr Qaltaev. Sý tasqynynyń saldarymen jáne aldaǵy qalpyna keltirý jumystarynyń kólemimen olardy vıtse-premer Qanat Bozymbaev tanystyrdy.
Qostanaı, Arqalyq qalalary men Amangeldi, Jangeldi, Qarasý jáne Qostanaı aýdandarynda jergilikti aýqymdaǵy TJ rejımi áli de saqtalyp otyr. Evakýatsııalyq pýnkterde 160 adam bar. Qanat Bozymbaev evakýatsııalanǵan azamattarmen kezdesip, olarǵa shyǵyndaryn óteý tártibin túsindirdi.
«Turǵyn úıdi qalpyna keltirý múmkin bolmaǵan jaǵdaıda biz úıdi salyp beremiz nemese ákimdik ony satyp alady. Bul demeýshiler, metsenattar men bıznes ókilderi esebinen jasalady. Áleýmettik jeli qoldanýshylary iri bıznes ókilderi turǵyn úıdi qalpyna keltirýge bólgen qarajattyń saqtalýyna alańdaýshylyq bildirip jatyr. Bul qarajatty negizinen bıznes ózi jumsaıtyn bolady. Olar zardap shekkenderge baspana satyp alyp beredi, úı salady nemese jóndeıdi», — dep túsindirdi vıtse-premer.
Qanat Bozymbaev, memlekettik qyzmetshiler jer bólý men úlgilik jospardy jasaýdan bólek, úılerdi satyp alý, jóndeý nemese salý protsesine yqpal etpes úshin, demeýshilerdiń jergilikti nemese menshikti qurylys kompanııalaryna tikeleı qarajat bóletinin atap ótti. Vıtse-premer ótemaqy men qarjylyq kómekke jeke toqtaldy. Qostanaı oblysynyń turǵyndarynan birjolǵy tólem alýǵa 3 myńnan astam ótinish kelip tústi. Jalpy somasy 705,2 mln teńgege 2 myńǵa jýyq otbasyna qarjylyq kómek kórsetildi.
«Barlyq zardap shekkenderge 100 AEK tóleý jergilikti atqarýshy jáne ókildi organdardyń, ıaǵnı máslıhattar men ákimdikterdiń quzyretinde. Olar kimge qandaı somany jáne qalaı tóleý keregin anyqtaıdy. Máseleniń barshaǵa ortaqtyǵyn eskere otyryp, Shuǵyl shtabqa zardap shekkenderdiń barlyǵyna, onyń ishinde úıi sýǵa ketkender men tasqyn saldarynan kóshýge májbúr bolǵandarǵa, sondaı-aq, saıajaı ıeleri men jaldap turǵandar jáne saıajaı — jalǵyz baspanasy bolǵandarǵa 100 AEK tólem jasaýǵa keńes berdik», — dedi Qanat Bozymbaev.
Sondaı-aq, sý tasqynynan zardap shekkender 150 AEK kóleminde joǵalǵan jáne búlingen múlik úshin ótemaqy alýǵa quqyly. Mundaı múliktiń tizimine tamaq saqtaýǵa jáne daıyndaýǵa arnalǵan zattar, tamaq ishýge arnalǵan jıhaz, uıyqtaýǵa arnalǵan jıhaz, azamattardy aqparattandyrý quraldarynyń zattary, sýmen jabdyqtaý jáne jylytý quraldary kiredi. Vıtse-premer arnaıy komıssııalarǵa 10 mamyrǵa deıin sý tasqynynyń zalalyn baǵalaý boıynsha barlyq jumystardy aıaqtaýdy tapsyrdy.
Búginde Qostanaı aýdanynyń turǵyndaryna jańa kópqabatty úılerdiń birinde páterler berile bastady. Aýdan ákimdigi turǵyn úı berý úshin 30-ǵa jýyq shart jasasty. Kásipker Danııar Ábilǵazınniń «Aıala» qory turǵyndarǵa qarjylaı kómektesti: kásipker Qostanaı aýdany men Arqalyq qalasynyń jalpy 65 otbasyna jeke qarajatynan 1,5 mlrd teńgege páter satyp alyp berip, taǵy 500 mln teńgeni «Demeý» qoryna jiberedi.
«Meniń úıim Altynsarın aýylynda jartylaı sý astynda qaldy. Ol turýǵa jaramsyz dep tanyldy. Birden úlken qoldaý kórsetildi, qajet zattardyń bárimen qamtamasyz etti. Meniń úsh balam bar, bizge jańa úıden úsh bólmeli páter berildi. Sizderge kóp rahmet!» — dep Qostanaı oblysynyń turǵyny Ásem Kamalova alǵysyn bildirdi.
Kún sýytpaı turyp jergilikti bılik baspanasyz qalǵan barlyq adamdardy baspanamen qamtamasyz etýi kerek. Qostanaı oblysynyń ákimdigine iri kásipkerler 378 úı satyp alyp berip, 638 úıdi jóndeýge kómektesedi.
«El úshin qıyn ýaqytta eshkim shette qalmaýy kerek. Qostanaı oblysynda bizdiń birneshe kásiporyndarymyz bar jáne bizdiń qyzmetkerler apatqa qarsy kúreske, aýyl turǵyndaryn, atap aıtqanda balalardy sý basý aımaǵynan shuǵyl evakýatsııalaýǵa belsendi qatysty. Arqalyq mańyndaǵy aýyldarǵa bóget salý úshin arnaıy tehnıkamyz jiberildi. Baspanasyz qalǵandar úshin biz daıyn baspana satyp alyp beremiz», — dedi ERG kompanııasy menedjerler keńesiniń múshesi Shýhrat Ibragımov.
Aıta keteıik, Eurasian Resources Group negizin qalaýshy aktsıonerler sý tasqynynyń alǵashqy kúnderinde 400 mln jáne taǵy 40 mlrd teńge bóldi. ERG qarajatyna jol jáne ınjenerlik ınfraqurylym, sondaı-aq Qostanaı oblysyndaǵy zardap shekken mektepter qaıta jańartylady.
Kásipker Andreı Lavrentev óńirge 3 mlrd teńge baǵyttaıtynyn aıtty. Bul qarjylaı kómek 140 úı salýǵa nemese 96 páter satyp alýǵa, sondaı-aq 400 úıdi jóndeýge jumsalady. Sonymen qatar Andreı Lavrentevtiń kompanııalary «Demeý Qazaqstan qory» korporatıvtik qoryna 500 mln teńge aýdarǵan bolatyn.
«Myna qıyn sát bizdi biriktirdi. Qostanaıǵa úlken sý kelgennen keıin bizdiń myńnan astam qyzmetkerimiz ákimdik pen arnaıy qyzmetterdiń mamandarymen birge bógetterdi nyǵaıtýmen aınalysyp, adamdarǵa kómektesti. Bul bizdiń týǵan ólkemiz, bizdiń barlyq kásiporyndarymyz osynda. Bólingen qarajatqa páterler satyp alynyp, úıler salynatyn bolady. Biz Memleket basshysynyń úndeýin iske asyrýǵa atsalystyq jáne meniń oıymsha, biz bul jumysty Úkimetpen birge mindetti túrde jasap bitiremiz», — deıdi Andreı Lavrentev.
Óz kezeginde RG Brands kompanııasy Qostanaı oblysynda turǵyn úı salýǵa jáne qalpyna keltirýge 1,46 mlrd teńge bóledi.
Esterińizge sala keteıik, metsenattardy jekelegen óńirge bekitý aıasynda jańa turǵyn úı qurylysy Soltústik Qazaqstan oblysynda bastaldy. Munda jergilikti turǵyndarǵa Kaspi.kz dırektorlar keńesiniń tóraǵasy Vıacheslav Kım, Kazakhmys Holding Dırektorlar keńesiniń tóraǵasy Edýard Ogaı jáne KAZ Minerals Management basqarma tóraǵasy Eldar Mamedov kómektesýge bel býdy. Sý tasqyny saldaryn joıýǵa Kazakhmys jáne KAZ Minerals kompanııalary barlyǵy 40 mlrd teńge baǵyttaıdy. Al Kaspi.kz 20 mlrd teńge bóledi.
