Forbes tizimindegi úshinshi adam Quryq portyna ınvestıtsııa salmaqshy

ASTANA. QazAqparat – Quryltaıshysy Forbes tizimindegi úshinshi adam bolyp sanalatyn «Adani» kompanııasy Quryq portyn keńeıtý jobasyna ınvestıtsııa salýǵa nıetti, dep habarlaıdy QazAqparat tilshisi.

Syrtqy ister mınıstriniń orynbasary Almas Aıdarov Astanada ótip jatqan ınvestıtsııalyq forým kýlýarynda jýrnalısterge osyndaı málimet berdi.

«Bul jolǵy qol qoıylatyn jobalardyń arasynda Aqtóbe qalasyndaǵy ıadrolyq medıtsına ortalyǵyn aıtýǵa bolady. Quryq portyn keńeıtý jónindegi joba bar. Bul joba aıasynda Úndi eliniń kompanııasymen de qujatqa qol qoıyp jatyrmyz. Shyǵys Qazaqstandaǵy lıtıı ken ornyn ıgerýge baǵyttalǵan úlken joba taǵy bar. Almatydaǵy avtokomponetterdi óńdeıtin jańa zaýyt jobasyn aıtýǵa bolady. Aýyl sharýashylyǵynda «Almaty jemisteri» degen jańa joba ashyp jatyrmyz», - SІM ókili Quryq portyn keńeıtý jobasyna keńirek toqtaldy.

«Baǵana da aıtqanymdaı, jalpy jıyny 25 qujatqa qol qoıylady. Olardyń ishinde jańa jobalar da bar. Mysaly, Quryq porty boıynsha Úndi eliniń «Adani» degen úlken kompanııasy ınvestıtsııa salmaqshy. Onyń ıesi – qazir «Forbstaǵy» úshinshi adam. Olar Qazaqstanǵa jańadan enip otyr, memorandýmǵa qol qoıady. Al keıbir jobalar 12 jyldyńkóleminde iske asyrylyp jatyr. Olar boıynsha da kelisimder jasalady. Satyp alý kelisimderi de bar. Lıtıı ken orny osy baǵytta iske asady», - dedi Almas Aıdarov.

Vıtse-mınıstrdiń aıtýynsha, Quryq portyn keńeıtýge ınvestıtsııa salýǵa nıetti «Adani» kompanııasy Úndi elindegi logıstıkalyq naryqtyń 30 paıyzyn qamtıdy.

«Qazaqstan aýmaǵynda birneshe jobaǵa qyzyǵýshylyq tanytyp otyr. Astana áýejaıyna qyzyǵýshylyq bildirýde. Onymen qosa Quryq portyna da termınal salýǵa yntaly. Sebebi Reseı arqyly ótetin júk tasymaldaý qıyndap jatqanyna baılanysty Kaspıı arqyly Ázerbaıjanǵa, Grýzııa arqyly Qara teńizge shyǵatyn marshrýtqa aqsha salmaqshy», - dedi vıtse-mınıstr.

Foto:azattyq-ruhy.kz